Апостальскую нунцыятуру ў Беларусі ўзначаліў італьянец Інняц'ё Чэфалья. Гэтая пасада была вольнаю з леташняга чэрвеня.
Папа Францішак прызначыў арцыбіскупа-наміната Інняц'ё Чэфалья апостальскім нунцыем у Беларусі, перадае выданне «Vatican News».
Чэфалья – нарадзінец Палерма, яму 49 гадоў. Дыпламатычную службу пачаў у 2006-м. Валодае італьянскай, албанскай, французскай, англійскай, іспанскай мовамі.
Працаваў у прадстаўніцтвах Ватыкану ў Эквадоры і Тайландзе, у сталай місіі пры Радзе Еўропы ў Страсбуры, у секцыі ў справах стасункаў з дзяржавамі і міжнароднымі арганізацыямі Дзяржаўнага сакратарыяту. Да апошняга часу служыў у Венесуэле.
Пасада нунцыя ў Беларусі была вольная з 28 чэрвеня 2024 года, калі яе пакінуў арцыбіскуп Антэ Ёзыч. Яго прызначылі дыпламатычным прадстаўніком Папы ў Грузіі і Арменіі.
Апостальская нунцыятура – амбасада Ватыкану. У Беларусі яна з'явілася ў 1992 годзе пасля ўсталявання дыпламатычных стасункаў з Святым пасадам.
Сцяпан Кубік belsat.eu
