Абраная прэзідэнтка Святлана Ціханоўская абвесціла пра перанос «нашага „чырвонага пашпарта“ ў тыя краіны, дзе праблема з дакументамі ніяк не вырашаная». «Белсат» спытаў у галоўнага дарадцы Ціханоўскай Франка Вячоркі, што гэта значыць.
Святлана Ціханоўская падчас прамовы ў Сейме Літвы з нагоды Дня Волі заклікала ўлады суседняй краіны «выдаваць міжнародную абарону і дазволы на жыхарства сумленным беларусам». Яна канстатавала: шмат якія беларусы не могуць вярнуцца дадому і застаюцца без дакументаў, а бацькі не могуць аформіць нованароджаных дзяцей.
«У Літве ёсць выдатнае развязанне – пашпарты замежніка, і мы просім спрасціць і пашырыць практыку яго выдавання. А наш „чырвоны пашпарт”, які мы планавалі выдаваць, мы перанясём у тыя краіны, дзе праблема з дакументамі ніяк не вырашаная», – цытуе Ціханоўскую выданне Reform.news.
Галоўны дарадца абранай прэзідэнткі Франак Вячорка растлумачыў «Белсату», што гэта азначае перанос друку пашпартоў з Літвы ў іншую краіну. Самога пашпартавага цэнтру ў Вільні закрываць не плануюць:
,,«У Літве паставім на паўзу, выраб пашпартоў перанясём у іншую краіну. А з боку Літвы нас запэўнілі: ёсць гатовасць спрыяць у развязанні пытанняў легалізацыі і выдаванні пашпартоў замежніка».
Дзе пашпарты плануецца друкаваць, пакуль невядома. «Працуем над гэтым», – запэўніў Вячорка.
Пашпарт Новай Беларусі мае стацца заменаю дзяржаўнага сіняга пашпарта для тых беларусаў, якія з увагі на палітычны пераслед не могуць з'ездзіць на радзіму, каб атрымаць дакумент. Галоўная праблема праекту – дамагчыся, каб пашпарты Новай Беларусі прызнавалі ў свеце.
Выраб дакументаў планаваўся ў Літве, аднак у студзені Генеральная пракуратура рэспублікі выслала ліст Беларускаму пашпартаваму цэнтру, які можна ўспрыняць як пагрозу крымінальнай адказнасцю за выраб і выдаванне пашпартоў, пакуль гэтыя дакументы не будуць прызнаныя ў вызначаным законам парадку.
А міністр унутраных справаў краіны Уладзіслаў Кандратовіч надоечы казаў, што «на гэты момант у МУС не бачаць падставаў» прызнаваць пашпарт Новай Беларусі дакументам, дзякуючы якому выдаваўся б від на жыхарства, або дакументам падарожніка ці пашпартам замежніка.
Франак Вячорка ў каментары «Белсату» тады адзначаў, што ў розных краінах статус пашпарта Новай Беларусі можа быць розны:
«Калі ў Літве ці ў Польшчы ёсць часовае развязанне з пашпартамі замежніка, то ў многіх іншых краінах няма такога развязання, і там пашпарт можа спрацаваць. Магчыма, пашпарт будзе мець і выконваць іншыя ролі, у тым ліку верыфікацыі тых асобаў, якія перабываюць ужо на тэрыторыі Еўрапейскага Звязу. Гэта ўсё прадмет для размоваў».
Сцяпан Кубік belsat.eu
