На сайце кампаніі «БелЮрЗабеспячэнне» з’явілася інфармацыя аб продажы часткі былой рэзідэнцыі князёў Радзівілаў пад Нясвіжам.
Паводле абвесткі, прадаецца адміністрацыйны будынак «іншага прызначэння» «Альба». Ён складаецца з цэлага двухпавярховага цаглянага асноўнага корпусу ў вытворчасці біяміцыну П2/к з халоднай прыбудоваю. Яго плошча – 1322,7 кв. м. Як адзначаецца, будынак – гістарычна-культурная каштоўнасць. Мінімальная цана – 12 479 рублёў (каля 3500 долараў).
Сам будынак ёсць ацалелаю часткаю рэзідэнцыі князёў Радзівілаў у маёнтку Альба пад Нясвіжам, што заклаў яшчэ ў XVI стагоддзі Мікалай Крыштаф Радзівіл Сіротка. У маёнтку быў закладзены парк і збудаваны палац. Але ад палацаў – як пачатковага, гэтак і пазнейшых – у выніку войнаў нічога не засталося. Захаваўся толькі бровар, пабудаваны ў пачатку ХХ стагоддзя. У ім дагэтуль размяшчалася вытворчасць, а сам будынак быў моцна перабудаваны і дабудаваны.
8 студзеня Святлана Ціханоўская ўручыла ў Варшаве нацыянальныя ўзнагароды за дзейнасць на карысць Беларусі. Сярод узнагароджаных быў і князь Мацей Радзівіл.
Якуб Хруст belsat.eu
