Супраць 46-гадовай беларускі выставілі падазрэнне ў незаконным экспарце 192 аўтаў на суму 21,4 млн еўраў. У аперацыі з ператрусамі і арыштамі маёмасці бралі ўдзел каля 85 нямецкіх сілавікоў.
Мытнае крымінальнае кіраўніцтва Мюнхену і паліцыя Берліну правялі 12 сакавіка цэлую аперацыю супраць 46-гадовай беларускі, падазраванай у абыходзе санкцыяў. Каля 85 сілавікоў выконвалі ордары на арышт маёмасці і ператрусы. Жанчына трапіла пад папярэдні арышт, у яе былі канфіскаваныя чатыры дарагія аўтамабілі і два прычэпы, камерцыйныя дакументы і носьбіты звестак.
Паводле нямецкіх праваахоўнікаў, ад 5 красавіка 2022 года жанчына з двума саўдзельнікамі экспартавала ў Расею люксавыя аўтамабілі насуперак санкцыям, уведзеным у сакавіку таго года. Каб абысці санкцыі, падазраваная стварала ўражанне, што машыны накіроўваюцца не ў Расею, а ў Беларусь, Кыргызстан, Таджыкістан і Узбекістан. Аднак 186 аўтаў у выніку былі непасрэдна зарэгістраваныя ў Расеі.
Агулам жанчына і ейныя саўдзельнікі, як лічаць праваахоўнікі, магла экспартаваць у Расею 192 аўтамабілі агульным коштам 21 413 161,31 еўраў. На маёмасць на адпаведную суму быў накладзены арышт. Якое пакаранне можа пагражаць жанчыне, не паведамляецца.
Алесь Наваборскі belsat.eu
