Праваабаронцы прызналі палітычнымі зняволенымі асуджаных нібыта за групавыя дзеянні, якія груба парушаюць грамадскі парадак, і абвінавачаных у іх.
Праваабарончыя арганізацыі «Вясна», «Прававая ініцыятыва», «Lawtrend» і «Human Constanta», а таксама Беларускі ПЭН прызналі палітычнымі зняволенымі яшчэ 10 чалавек, якіх абвінавацілі або ўжо накіравалі на адбыванне пакарання паводле ч.1 арт. 342 КК РБ. У спіс палітвязняў дадалі:
- Ганну Кміт,
- Андрэя Селянінава,
- Яўгена Нікалаевіча,
- Дзмітрыя Ляха,
- Дзмітрыя Чарнуху,
- Аляксандра Крупнікава,
- Дзмітрыя Глушчанку,
- Сяргея Чэкеля,
- Уладзіміра Апановіча,
- Арцёма Пуценіча.
Як адзначаюць праваабаронцы, гэтых людзей пакаралі за рэалізацыю права на свабоду мірных сходаў, гарантаванае артыкулам 21 Міжнароднага пакту аб грамадзянскіх і палітычных правах. Праваабаронцы падкрэсліваюць, што пратэсты 2020 года насілі стыхійны, самаарганізаваны і мірны характар; яны былі выкліканыя недаверам да вынікаў выбараў, якія праходзілі з парушэннямі і фальсіфікацыямі, не былі прызнаныя міжнароднай супольнасцю дэмакратычнымі, свабоднымі і справядлівымі. Супраць пратэстоўцаў, якія не ўяўлялі пагрозы ні нацыянальнай, ні грамадскай бяспецы, сілавікі ўжылі непрапарцыйны гвалт, спецсродкі і зброю.
Праваабаронцы патрабуюць неадкладна спыніць крымінальны пераслед і вызваліць як 10 названых чалавек, так і астатніх палітычных зняволеных і грамадзянаў, затрыманых з палітычных матываў.
Агулам на момант публікацыі ў спісе палітвязняў на сайце «Вясны» 1254 асобы. Гэтая лічба апошнім часам мала мяняецца: хоць некаторых палітвязняў вызваляюць па сканчэнні тэрміну або праз памілаванне, паралельна за краты з палітычных матываў кідаюць новых людзей.
Насамрэч палітычных зняволеных у Беларусі больш за 1254 асобы: праваабаронцы разглядаюць кожную справу на адпаведнасць азначэнню «палітвязень» і не паспяваюць за рэпрэсіўнай машынай, а некаторыя сваякі зняволеных выступаюць супраць уключэння тых у лік палітвязняў. Некаторыя праваабарончыя супольнасці называюць большыя лічбы і крытыкуюць «Вясну» за занадта кансерватыўны падыход, які не адпавядае рэпрэсіўным практыкам цяперашняй Беларусі.
Алесь Наваборскі belsat.eu
