Украіна не выдае інфармацыю пра замежнікаў, якія яе бароняь, а ў Літве няма спецыялістаў, якія могуць гэта праверыць, расказвае літовец, які інструктуе беларускіх ваяроў.
Літоўскі вайсковы інструктар Рымас Армайціс, які бараніў Украіну і стаў інструктарам палка імя Кастуся Каліноўскага, пракаментаваў на Facebook справу затрыманага ў В’етнаме і экстрадаванага ў Беларусь былога ваяра палка Каліноўскага і дзейнага дэлегата Каардынацыйнай рады Васіля Верамейчыка.
Верамейчыка выдалі ў Беларусь з В’етнаму тыдзень таму. У В’етнаме ён апынуўся пасля таго, як Літва назвала яго «пагрозаю нацыянальнай бяспецы». Таксама адзначаецца, што на просьбу штабу палка Каліноўскага, з якім у Верамейчыка паўстаў канфлікт, Служба бяспекі Украіны закрыла яму ўезд ва Украіну.
Армайціс піша:
,,«Я ўсё разумею, але мой розум не ўспрымае, як чалавек, які ваюе супраць рэжыму Пуціна на фронце ва Украіне, можа пагражаць нашай нацыянальнай бяспецы».
Паводле яго, уся «пагроза» заключалася ў тым, што Верамейчык пазначыў у анкеце, што скончыў беларускую вайсковую вучэльню і раней служыў у войску Беларусі. Тое, што ён ваяваў на баку Украіны з першых дзён расейскага ўварвання, проста не ўлічылі.
З аднаго боку, інструктар абураецца: рашэнне аб такой «пагрозе бяспецы Літвы» мог прыняць або вельмі глупы чалавек, або пракрамлёўскі агент. З другога боку, ён тлумачыць:
«Праблема ў тым, што Украіна не дае інфармацыі пра замежнікаў, якія ваююць на ейнай тэрыторыі, нікому (і правільна робіць, асабліва ў адносінах да Літвы), а гэтае „я ваюю“ для нашых службаў не з’яўляецца доказам. У сістэме не засталося прафесіяналаў, здольных гэта праверыць, засталіся ў асноўным толькі менеджары».
У гэтым ён вінаваціць літоўскіх палітыкаў, якіх таксама лічыць «толькі менеджарамі». І нагадвае, што Алесь Бяляцкі ў 2011 годзе трапіў за краты, калі Літва і Польшча на запыт беларускіх уладаў перадалі ім інфармацыю пра банкаўскія рахункі беларусаў, у тым ліку Бяляцкага.
Кіраўнік фонду «BYSOL» Андрэй Стрыжак напісаў у Facebook, што Верамейчык звяртаўся па дапамогу, калі яго прызналі «пагрозаю нацыянальнай бяспецы» ў Літве, выканаў першую інструкцыю пра пераезд у Грузію і атрымаў алгарытмы далейшых дзеянняў у легалізацыі ў Еўразвязе, але пасля гэтага перастаў выходзіць на сувязь.
Стрыжак нагадаў: сістэма прызнання «пагрозаю нацыянальнай бяспецы» ў Літве ўвесь час крытыкуецца з боку праваабаронцаў як недасканалая. «BYSOL» жа падтрымлівае тых, каго прызналі «пагрозаю Літве», і адкрывае зборы на адвакатаў, каб у законным парадку абскарджваюць такія пастановы ў літоўскіх судах.
Фонд «BYSOL» адкрыў збор на падтрымку Верамейчыка і ягонай сям’і: жонка зняволенага просіць 8 тысяч еўра на адвакатаў і перадачы.
Прадстаўнік Аб’яднанага пераходнага кабінету ў абароне, былы намеснік камандзіра палка Каліноўскага Вадзім Кабанчук расказаў радыё «Свабода», што ён не ведаў аб забароне Верамейчыку ўезду ва Украіну – Верамейчык мог і сам не ведаць, бо выязджаў з Украіны без перашкодаў, не быў дэпартаваны. Што да самой забароны на ўезд, Кабанчук тлумачыць гэта магчымай нескаардынаванасцю розных ведамстваў і агулам станам вайны.
Колькі беларусаў Літва назвала «пагрозаю нацыянальнай бяспецы», невядома: паведамлялі толькі, што з лістапада 2022 года да лістапад 2023-га такіх было 1644. Прыкметаю пагрозы могуць палічыць службу ў беларускім войску, працу на БелАЭС ці працу ў кол-цэнтры банку. На момант публікацыі невядома аб справах супраць беларусаў у Літве за шпіянаж на карысць Беларусі, але вядома, што ў Беларусі вярбуюць літоўцаў – прынамсі аднаго літоўца ўжо асудзілі за шпіянаж на карысць рэжыму Лукашэнкі.
Міністр нацыянальнай абароны і Міністарка ўнутраных справаў Літвы казалі «Белсату», што з сітуацыяй Верамейчыка незнаёмыя, адсылалі да Дэпартаменту міграцыі і Дэпартаменту дзяржаўнай бяспекі. Каментары з гэтых інстытуцыяў «Белсату» пакуль не ўдалося атрымаць.
Таксама глядзіце ў сюжэце:
Алесь Наваборскі belsat.eu
