«ДимДимыч», «Анджилиша» і «Улька Пулька» кажуць, што ім «Надо», каб Лукашэнка пайшоў на наступны тэрмін.
Аўтар прапагандысцкай песні «Любимую не отдают», кампазітар і ўдзельнік гурта «Aura» Яўген Алейнік напісаў песню «Надо» ў падтрыманне Аляксандра Лукашэнкі. У запісе паўдзельнічалі Аляксандр Саладуха, Анатоль Ярмоленка і папулярныя беларускія блогеры-тыктокеры. Песню заўважыла «Наша Ніва», а пра маладых блогераў расказаў «Citydog».
«Надо» – акцыя ў падтрыманне Лукашэнкі, што перайшла ў выбарчую кампанію. Гэтым словам «надо» адказваюць на словы Лукашэнкі пра тое, што ён пойдзе на чарговыя выбары і сёмы тэрмін, толькі «калі прыхільнікі скажуць, што трэба».
У TikTok відэа на песню «Надо» сабрала за тыдзень больш за 30 тысяч праглядаў, але даволі мала «падабаек» для такой колькасці праглядаў: толькі 735. У Instagram лайкаў крыху больш – 941.
У запісе паўдзельнічалі 24-гадовы Дзмітрый Сіўчык («Дим Димыч»), 22-гадовая Ангеліна Міхалева («Анджилиша») і 20-гадовая Ульяна Сталярова («Улька Пулька»).
«Дим Димыч» пачысціў свае старыя публікацыі, але сярод тых, што засталіся, ёсць фота з прапагандыстам Рыгорам Азаронкам, а таксама з кувалдай – сімвалам баевікоў «групы Вагнэра». Блогер ствараў відэа для дзяцей, быў рэкламным тварам сеткі «Еўраопт», але праз ціск прарасейскай актывісткі Вольгі Бондаравай быў вымушаны пайсці на «пакаяннае» інтэрв’ю да Азаронка і ў Міністэрства культуры, дзе яго папрасілі «ўнесці правільныя карэктаванні» ў кантэнт – і ён сапраўды змяніў свой стыль. У лістападзе ён далучыўся да праўладнай партыі «Белая Русь».
«Анджилиша» была амбасадаркай мабільнага аператара «А1», актыўна ўдзельнічаць у дзяржаўнай прапагандзе пачала ў канстрычніку 2024 года: з’ездзіла на праўладны «Марафон адзінства» і рэпрэзентавала кампанію «Надо» як «народны трэнд». Сярод іншага, яна назвала Мікалая Лукашэнку, малодшага сына Аляксандра Лукашэнкі, сваім «крашам» – тым, у каго закаханая.
Таксама ў запісе песні бралі ўдзел іншыя тыктокеры: Мікіта Бялько, Каця Лабкоўская, Насця Краўчанка і Ангеліна Волкава (апошняя, падобна, больш за іншых у захапленні ад працы на «Студыю Аўра»).
У прапагандысцкіх акцыях таксама пачаў удзельнічаць тыктокер Улад Кабякоў. Ён, як адзначае «Citydog», не ўдзельнічаў у запісе песні «Надо», але браў удзел у самой акцыі і ў «Марафоне адзінства», наведваў прапагандысцкія акцыі на дзяржаўных заводах. Блогера бачылі на пратэстах у 2020 годзе, але пасля пагрозаў ад сілавікоў і прапагандыстаў ён прыйшоў на інтэрв’ю да Марата Маркава на ОНТ і расказаў, што любіць Расею, бываў у акупаваным Крыме і больш не дапусціць такіх памылак, як удзел у пратэстах.
Міністэрства інфармацыі ў верасні 2024 года арганізавала форум блогераў «БлогБай. Нам ёсць што сказаць». У першы дзень зоркі інтэрнэту распрацоўвалі ўласныя праекты і вучыліся ствараць кантэнт пад кіраўніцтвам прапагандыстаў і сілавікоў. Азаронак паспрабаваў апраўдаць гэткі кантроль неабходнасцю: «Нельга жыць у грамадстве і быць вольным ад дзяржавы, вольным мастаком, у вольным палёце».
З другога боку, улады «ваююць» з незразумелымі ім моладзевымі трэндамі: летась змагаліся з няісным «ЧВК Рёдан», сёлета – з квадроберамі.
Алесь Наваборскі belsat.eu
