Выканаўца Aрсень Кісляк, які выступае пад псеўданімам AP$ENT, раптоўна адмяніў канцэрты ў сталіцах краінаў Балтыі, запланаваныя на гэтым тыдні.
AP$ENT не будзе выступаць у Таліне, Вільні і Рызе 26, 27 і 29 верасня адпаведна, паведамляе «Еўрарадыё».
Журналістам удалося звязацца з выканаўцам і высветліць прычыны такога павароту падзеяў.
Як паведаміў сам спявак, ён стаміўся і захацеў зрабіць перапынак.
,,«Я проста стаміўся і расчараваўся. Адбылася чарада падзеяў рознай ступені непрыемнасці, якія падсадзілі мае эмацыйныя акумулятары, – кажа Арсень Кісляк, вядомы пад псеўданімам AP$ENT. – Усё сапраўды добра атрымліваецца, аўдыторыя супервыдатная. Але я не вывожу столькі арганізацыйнай працы і працы з людзьмі. Мне трэба адпачыць, пагрузіўшыся ў творчасць».
Нагадаем, выканаўца AP$ENT ёсць аўтарам хіта «Можно я с тобой». Нарадзінец Украіны, ён разам з маці пераехаў з Харкава ў Магілёў, калі яму быў усяго адзін год.
Праект AP$ENT з’явіўся ўлетку 2018 года. Першы хіт, песню «Мылю и молюсь» з крытыкаю ковід-дысідэнцтва кіраўніка Беларусі Аляксандра Лукашэнкі, спявак запісаў для расейскага конкурсу «Карантиновидение». У 2020 годзе ён выдаў трэк «Песенка веселого беларуса», прысвечаны выбарам-2020.
Цяпер галоўны хіт AP$ENT’а – «Можно я с тобой». Як тлумачыў спявак, песня была пра ад’езд ягонай сям’і з Беларусі ў Грузію пасля рэпрэсіяў супраць ягонай жонкі: яе асудзілі на год абмежавання волі за «знявагу Лукашэнкі» ў звязку з каментаром пра арышт Рамана Пратасевіча ў тэлеграм-канале «Nexta». Музыка казаў, што «проста зарыфмаваў падзеі са свайго жыцця».
У расейскамоўным сегменце інтэрнэту песню часта выкарыстоўваюць як фон для відэа пра ратаванне бадзяжных жывёлінаў. Сам музыка быў не супраць такой інтэрпрэтацыі.
У сакавіку 2024 года расейскі музычны сэрвіс «Яндекс Музыка» заблакаваў старонку AP$ENT’а для карыстальнікаў з Расеі.
Раман Шавель belsat.eu
