У Беларусі пасля палення вэйпа памерла 16-гадовая дзяўчына, распавёў падчас прэс-канферэнцыі 17 сакавіка намеснік кіраўніка аддзелу арганізацыі працы інспекцыі ў справах непаўналетніх Галоўнага ўпраўлення аховы правапарадку і прафілактыкі МУС Васіль Дземідовіч. Гэта першы выпадак смерці падлетка, звязаны з электроннымі прыладамі для палення.
Здарэнне адбылося ў Дзяржынску. Дзяўчына паліла вэйп у кампаніі сяброў і праз некалькі хвілінаў адчула сябе кепска, страціла прытомнасць. Уратаваць яе не атрымалася.
Штогод у Беларусі фіксуюцца выпадкі шпіталізацыі дзяцей пасля ўдыхання пароў вэйпаў, аднак смерцяў пакуль не было, зазначыў прадстаўнік МУС. Ведамства заклікала бацькоў і адукацыйныя ўстановы узмацніць кантроль за непаўналетнімі.
Васіль Дземідовіч спаслаўся на статыстыку Сусветнай арганізацыі здароўя, паводле якой электронныя прылады палення забароненыя больш чым у 30 краінах свету.
,,«Цяпер мы прапрацоўваем пытанне мэтазгоднасці поўнай забароны ў Беларусі электронных сістэмаў палення ці магчымасці выключыць са складу вадкасцяў да іх харчовыя араматызатары», – паведаміў прадстаўнік МУС.
У Беларусі ўжо цягам некаторага часу абмяркоўваюцца абмежаванні продажу электронных цыгарэтаў і сістэмаў для палення, якія прапісалі ў законапраекце «Аб дзяржаўным рэгуляванні вытворчасці, абароту і спажывання тытунёвай сыравіны, тытунёвых вырабаў, нетытунёвых вырабаў з утрыманнем нікатыну, вадкасцяў для электронных сістэмаў курэння, электронных сістэмаў курэння і сістэмаў для спажывання тытуню».
Марыя Міхалевіч belsat.eu
