Надоечы мы пісалі, што таксі «Maxim» было выключанае з Рэестру аўтамабільных перавозак пасажыраў. Як паведаміла прэс-служба таксі, быў выключаны не сам сэрвіс, а яго партнёр, таму таксі працягне працу ў Беларусі. Пра блакаванне інфармацыйных рэсурсаў прэс-служба кажа, што яно было здзейсненае ў аднабаковым парадку і з парушэннем прававых працэдураў.
З дзяржаўнага Рэестру аўтамабільных перавозак пасажыраў, згодна з інфармацыяй прэс-службы «Maxim», быў выключаны франчайзі-партнёр сэрвісу.
,,«Працэдуру выключэння з рэестру дыспетчараў скарысталі да франчайзі-партнёра. Брэнд "Maxim" застанецца працаваць на рынку Беларусі пасля зняцця блакавання інфармацыйных рэсурсаў», – сцвярджаюць у фірме.
Каб зразумець сітуацыю, прэс-служба таксі раіць учытацца ў новае заканадаўства аб таксі, якое называе недасканалым.
«Па-першае, рэестр дыспетчараў і рэгістр сістэмаў – два розныя ўліковыя рэсурсы. У рэестры дыспетчараў ёсць дыспетчары, якія ажыццяўляюць функцыю перадавання замоваў. У рэгістры інфармацыйных сістэмаў ёсць сістэмы, якія апрацоўваюць базы звестак. "Maxim" ёсць выключна ўласнікам інфармацыйнай сістэмы. Функцыі дыспетчара выконваў франчайзі-партнёр», – патлумачылі ў кампаніі.
«Maxim» не здзяйсняў правапарушэнняў, якія маглі б стаць падставаю для блакавання інфармацыйнай сістэмы, сцвярджае прэс-служба:
,,«Сэрвіс захоўваў і апрацоўваў інфармацыю ў рамках заканадаўства. Блакаванне інфармацыйных рэсурсаў было здзейсненае ў аднабаковым парадку, "Maxim" не атрымліваў паведамлення. Гэта ёсць парушэннем прававых працэдураў. Сэрвіс будзе абскарджваць пастанову, дыспетчарам гатовы выступіць іншы франчайзі-партнёр, які абяцае выконваць усе патрабаванні. Нашая мэта – як мага хутчэй аднавіць магчымасць замовы паездак для жыхароў Беларусі і вярнуць крыніцу даходу для легальных перавозцаў».
Раней першы намеснік кіраўніка транспартавай інспекцыі Міністэрства транспарту і камунікацыяў Беларусі Юрый Касцюк паведаміў, што з Рэестру аўтамабільных перавозак пасажыраў, які працуе з 1 лістапада 2024 года, быў упершыню выключаны дыспетчар, звязаны з сэрвісам «Maxim», а таксама абмежаваны доступ да інтэрнэт-рэсурсу taximaxim.by.
Дыспетчар, які выкарыстоўваў сістэму «Maxim», пастановаю эканамічнага суда быў прыцягнуты да адміністратыўнай адказнасці ў выглядзе штрафу за незаконную прадпрымальніцкую дзейнасць з канфіскацыяй часткі даходу.
Марыя Міхалевіч belsat.eu
