У Польшчы здзейсніў суіцыд 32-гадовы Максім Чарняўскі, некалі вядомы як заснавальнік пабліку «Надоел нам этот Лукашенко» у 2010-х гадах. Да самагубства мужчыну падштурхнулі сямейныя праблемы, паведамляе «Наша Ніва».
Увечары 14 сакавіка Чарняўскі апублікаваў свой апошні пост у «Фэйсбуку», пасля чаго перастаў выходзіць на сувязь. У допісе беларус казаў, што вельмі любіць сваіх дачок і прасіў у іх прабачэння.
Максім Чарняўскі – заснавальнік пабліку «Надоел нам этот Лукашенко» у «Вконтакте» і сайту gonzo.by. У 2011 годзе, калі яшчэ быў студэнтам інстытуту журналістыкі БДУ, хлопец распавядаў, што яго спрабаваў вербаваць КДБ, пасля чаго ён з’ехаў у Польшчу, дзе працягнуў навучанне. Атрымаў адукацыю ў ІТ, апошнім часам працаваў у польскай страхавой кампаніі.
У другім шлюбе ў Максіма нарадзіліся блізняты – дзве дачкі.
Марыя Міхалевіч belsat.eu
