У Менскім гарадскім судзе 17 сакавіка вынеслі прысуд палітзняволенаму грамадзяніну Японіі Наканісі Масатосі – 7 гадоў калоніі ва ўмовах узмоцненага рэжыму і штраф 500 базавых велічыняў (21 тысяча рублёў), паведамляе праваабарончы цэнтр «Вясна».
Замежніку прызначылі максімальны тэрмін зняволення. Яго абвінавацілі ў «агентурнай дзейнасці» (арт. 358-1 Крымінальнага кодэксу Беларусі) з 2018 да 2024 года. Працэс у закрытым рэжыме цягам двух месяцаў з 14 студзеня вяла суддзя Анжэла Касцюкевіч.
Наканісі – грамадзянін Японіі. Ён выкладаў японскую мову ў Гомельскім дзяржаўным універсітэце імя Францыска Скарыны. Яго затрымалі яшчэ ў ліпені 2024 года, але падрабязнасці ягонага пераследу распавялі ў сюжэце БТ толькі ў верасні. Сцвярджалася, што мужчына «ажыццяўляў збор і перадачу на адрас японскай спецслужбы выведнай інфармацыі вайсковага характару».
Паводле праваабаронцаў, з 2020 года як мінімум 75 замежнікаў трапілі пад палітычны пераслед у Беларусі. Сярод іх – грамадзяне Украіны, Польшчы, Літвы, Латвіі, Эстоніі, ЗША, Японіі, Швецыі.
Марыя Міхалевіч belsat.eu
