Вынікі апошніх содняў поўнамаштабнай вайны, якую распачала Расея ва Украіне.
«Белсат» падводзіць вынікі апошніх содняў поўнамаштабнай вайны, якую распачала Расея ва Украіне. Пра галоўныя падзеі па стане на вечар 8 чэрвеня чытайце ў нашым аглядзе.
Паводле звестак Генеральнага штабу ЗСУ, з моманту поўнамаштабнага ўварвання ва Украіну страты расейскага войска дасягнулі 31500 чалавек забітымі.
Цягам апошніх содняў на Данецкім і Луганскім напрамках украінскія сілы адбілі адзінаццаць атак расейцаў. Паведамляецца, што асноўныя наступальныя дзеянні расейцы вялі ў раёне гораду Севераданецк. У горадзе па-ранейшаму працягваюцца вулічныя баі, наступам з паўднёвага і паўночнага бакоў вораг намагаўся атачыць украінскія сілы, але быў адкінуты назад.
Паводле наяўных звестак Генштабу ЗСУ, асабісты склад расейцаў дэмаралізаваны. Адзначаецца, што ў падраздзяленнях 106-й і 76-й паветрана-дэсантных дывізіяў вайскоўцы адмаўляюцца ад далейшага ўдзелу ў баявых дзеяннях і вяртаюцца на тэрыторыю РФ.
Разам з тым Амерыканскі інстытут вывучэння вайны (ISW) паведаміў, што расейцы пачалі адвод войскаў з пазіцыяў на поўначы Запарожскай вобласці. Гаворыцца, што расейцы хутка падняліся з многіх блокпастоў, а таксама пакінулі некаторыя вёскі.
Мапы баявых дзеянняў ад ISW:
Галоўнае ўпраўленне выведкі Мінабароны Украіны паведаміла, што Расея вярнула Украіне яшчэ 210 целаў вайскоўцаў, якія загінулі падчас абароны Марыупалю. Большасць з іх баранілі «Азоўсталь». Адзначаецца, што паралельна працягваецца праца і дзеля вяртання на радзіму ўсіх палонных вайскоўцаў.
Прэм’ер-міністр Польшчы Матэвуш Маравецкі пацвердзіў падпісанне пагаднення аб пастаўках узбраення Украіне. Палітык заявіў, што яно зʼяўляецца адным з найбуйнейшых за апошнія 30 гадоў. Гаворка ідзе аб угодзе на суму амаль тры мільярды злотых (амаль 630 мільёнаў долараў) на пастаўку каля 60 польскіх самаходных артылерыйскіх гаўбіц AHS Krab у дадатак да 18, якія Польшча ўжо перадала.
Сусветны банк ухваліў вылучэнне Украіне фінансавай дапамогі ў памеры 1,49 мільярда долараў, у выніку чаго агульны запланаваны пакет падтрымкі ўкраінскай эканомікі перавысіў 4 мільярды.
Міністр аховы здароўя Украіны Віктара Ляшко расказаў пра наступствы вайны для псіхікі ўкраінцаў. Паводле яго, псіхалагічная дапамога праз усю сітуацыю, якая развіваецца цяпер у краіне, спатрэбіцца прыкладна 15 мільёнам чалавек. Прычым 3–4 мільёнам давядзецца праводзіць медыкаментознае лячэнне.
У Анкары распачалася сустрэча міністраў замежных справаў Турэччыны і Расеі. Плануецца, што падчас яе Сяргей Лаўроў і Меўлют Чавушаглу абмяркуюць разблакаванне ўкраінскіх партоў.
Ангела Мэркель у першым сваім інтэрв’ю пасля адстаўкі рэзка асудзіла вайну Расеі супраць Украіны. Таксама былая канцлерка Нямеччыны заявіла, што прэзідэнт Расеі Уладзімір Пуцін хоча знішчыць Еўрапейскі звяз, у якім бачыць прыступку да NATO.
Віцька Кавалак belsat.eu
