У Вільні праходзіць цырымонія развітання з загінулымі амерыканскімі вайскоўцамі на Катэдральным пляцы.
Картэж з загінулымі вайскоўцамі спыніўся на Катэдральным пляцы, дзе яго сустрэлі арцыбіскуп Вільні, мітрапаліт Гінтарас Грушас, прэзідэнт Гітанас Наўседа, камандуючы ўзброенымі сіламі Літвы Раймундас Вайкшнарас, міністр нацыянальнай абароны Даоіле Шакаліене, іншыя афіцыйныя асобы, перадае «Delfi».
Міністэрства абароны Літвы заклікала жыхароў краіны выйсці на праспект Гедзіміна, схіліць галовы і аддаць даніну павагі загінулым падчас вучэнняў амерыканскім жаўнерам, якія «трэнаваліся абараняць нашую свабоду і, не шкадуючы сілаў і жыцця, выконвалі сваю прысягу да канца».
Нагадаем, што амерыканскія вайскоўцы ў гусенічнай браняванай машыне M88 зніклі 25 сакавіка падчас вучэнняў на палігоне ў Падброддзі. Наступным днём стала вядома, што машына затанула ў балоце. Яна была на глыбіні 4 метраў, над ёю былі 2 метры глею. Раніцаю 31 сакавіка ратавальнікам удалося дастаць з балота машыну. Пры гэтым у ёй былі знойдзеныя целы толькі трох з чатырох зніклых вайскоўцаў. Цела чацвёртага знайшлі ўвечары 1 красавіка.
