Аляксандр Лукашэнка абмеркаваў з Саветам бяспекі даклад пра нацыянальную бяспеку Беларусі і яе ўмацаванне. Сакратар Савету бяспекі запэўніў Лукашэнку, што ўсё добра, а нарошчваць вайсковыя бюджэты не трэба.
Аляксандр Лукашэнка правёў 3 красавіка нараду аб стане нацыянальнай бяспекі, вынес на разгляд Савету бяспекі даклад пра цяперашнюю сітуацыю і яе ўмацаванне. Паводле Лукашэнкі, парадак ацэнкі нацыянальнай бяспекі быў скарэктаваны ў «адпаведным указе». Што за ўказ, ён не тлумачыў, але, імаверна, гаворка пра леташні сакрэтны ўказ. Хто аўтар дакладу, не паведамлялася.
Лукашэнка прапанаваў абмеркаваць пытанні, апісаныя ў Канцэпцыі нацыянальнай бяспекі. Ён вызначыў дзевяць сфераў нацыянальнай бяспекі: палітычную, эканамічную, навукова-тэхналагічную, сацыяльную, дэмаграфічную, біялагічную, інфармацыйную, ваенную, экалагічную. У Савеце бяспекі яму растлумачылі, што асноўныя індыкатары такія:
- доля валавога назапашвання асноўнага капіталу;
- ступень уліку нормаў міжнароднага права і прадугледжаных у ім палітычна-прававых механізмаў пры развязанні пытанняў, якія закранаюць інтарэсы суб’ектаў міжнародных адносінаў;
- наяўнасць і эфектыўнасць міжнародных прававых і палітычна-прававых гарантыяў бяспекі і суверэнітэту Беларусі;
- узровень даверу да інстытутаў дзяржаўнай улады;
- унутраныя выдаткі на навуковыя даследаванні і распрацоўкі;
- узровень развіцця інфармацыйных тэхналогіяў і тэлекамунікацыяў;
- стан ваенна-палітычнай абстаноўкі.
- гатовасць вайсковай арганізацыі дзяржавы да выканання задач для запэўнівання ваеннай бяспекі;
- узровень вайсковай моцы дзяржавы.
Лукашэнка згадаў гарантыі бяспекі – іх ён мае ад Расеі і хоча іх пашырыць, а таксама хоча атрымаць нейкія гарантыі бяспекі ў сувязі з вайной ва Украіне. Сказаў, што пытанні, якія будуць абмяркоўвацца, трэба ўлічыць пры рыхтаванні ягонага паслання народу і Нацыянальнаму сходу.
Дзяржаўны сакратар Савету бяспекі Аляксандр Вальфовіч па выніках разгляду дакладу сказаў, што стан нацыянальнай бяспекі нармальны:
,,«У цэлым абстаноўка ацэньваецца станоўча. Вядома, ёсць моманты, ёсць некаторыя напрамкі, якія не цалкам залежаць ад дзейнасці прэзідэнта нашай краіны, кіраўніцтва і чальцоў Савету бяспекі. Ёсць фактары, якія стаяць над намі. Перш за ўсё напружвае замежнапалітычная абстаноўка. Сітуацыя ў свеце настолькі напружаная, з тэндэнцыямі да абвастрэння».
Узброеныя сілы Беларусі, дадаў Вальфовіч, не робяць стаўкі на павелічэнне вайсковых бюджэтаў і колькасці вучэнняў. Беларуская армія, адзначыў ён, працягвае атрымліваць новыя ўзоры ўзбраенняў і тэхнікі, але робіць стаўку на якасць падрыхтоўкі вайскоўцаў.
Вальфовіч адзначыў, што бачыць тое, што адбываецца «на сумежнай тэрыторыі», «на заходнім тэатры ваенных дзеянняў». Паводле яго, «палякі і прыбалты» цяпер «мілітарызуюцца, узмацняюць агрэсіўную рыторыку», а Польшча разгортвае новыя аператыўныя часткі і выведныя батальёны на мяжы з Літвой – у так званым сувальскім калідоры. На думку Вальфовіча, гэта робяць праз «уяўную пагрозу з Усходу», то бок ад Расеі і Беларусі.
Алесь Наваборскі belsat.eu
