Прадстаўніка «BELPOL» не здзіўляе перастрэлка расейскіх паліцыянтаў на трасе ў Беларусі: улады Беларусі стварылі ўмовы, у якіх такое можа здарыцца, а вынікі расследавання застануцца схаванымі ад грамадскасці.
Двое высокапастаўленых расейскіх работнікаў паліцыі ўчынілі перастрэлку ў Воршы раніцай 26 траўня, адзін застрэліў другога. Прэс-служба Міністэрства ўнутраных справаў Беларусі пацвердзіла, што перастрэлка была – забіты 45-гадовы расеец, а 41-гадовы расеец затрыманы.
МУС паказала, што страляніна была на трасе «Ворша-Віцебск» каля Высокага, прыклала фота пісталета, падобнага да расейскага траўматычнага пісталета «Фантом» 2-га пакалення, і белай «Лады» без нумароў. Больш пра здарэнне няма звестак. Выданне Orsha.eu, якое паведаміла пра страляніну, толькі выказвае здагадку, што прычынай магла быць «раптоўная асабістая непрыязнасць». Паводле выдання, стралялі маёр і падпалкоўнік паліцыі, абодва мелі траўматычныя пісталеты.
Ці будуць у Беларусі расследаваць «разборкі» расейскіх сілавікоў? Прадстаўнік аб’яднання «BELPOL» Уладзімір Жыгар кажа «Белсату», што расследаванне, хутчэй за ўсё, будзе, і да яго прыцягнуць расейскіх сілавікоў, а затрыманага могуць перадаць Расеі. Але расследаванне будуць весці максімальна закрыта, лічыць Жыгар, бо гэта «вельмі нязручная інфармацыя і вельмі нязручная сітуацыя».
,,«З такімі сітуацыямі МУС ужо неаднаразова сутыкаўся, калі тыя ж самыя супрацоўнікі так званых праваахоўных органаў перавышалі свае паўнамоцтвы, – згадвае Жыгар. – І зноў-такі ўсё гэта сыходзіла ў цень, інфармацыя не аддавалася грамадскасці тут».
Хоць «разборкі праваахоўнікаў з праваахоўнікамі» былі даўно, нядаўна бывалі, напрыклад, дарожныя здарэнні з удзелам вайскоўцаў расейскіх войскаў, працягвае Жыгар. І калі здарэнні былі, вынікі расследаванняў намагаліся нікому не расказваць і не паказваць.
Гэта стварае для беларусаў вялікую небяспеку і поўную непрадказальнасць, лічыць Жыгар. Да гэтага прывялі дзеянні рэжыму Аляксандра Лукашэнкі: і фактычная адсутнасць мяжы з Расеяй, і запрашэнне ў Беларусь баевікоў «групы Вагнэра», якія прыйшлі з вайны, на якую трапілі пасля зняволення за цяжкія і асабліва цяжкія злачынствы.
,,«Беларусам, вядома ж, варта апасацца, таму што рэжым ніяк не можа гэта кантраляваць, – кажа Жыгар. – І казаць пра гэта, выклікаўшы нейкі грамадскі рэзананс, яны таксама не будуць, таму што гэта будзе выклікаць свае іншыя нейкія праблемы».
Пакуль жа, паводле афіцыйных паведамленняў, следчыя вырашаюць пытанне аб пачатку крымінальнай справы і высвятляюць прычыны здарэння, а таксама род дзейнасці затрыманага і загінулага.
Р.М., Алесь Наваборскі belsat.eu
