«Белсат» даведаўся, як будзе працаваць новая сістэма і пры якой затрымцы можна будзе перасесці ў бліжэйшы да шлагбаума аўтобус бясплатна.
У тэлеграм-канале «Менсктранс. Міжнародныя маршруты» з’явілася паведамленне, паводле якога людзям надалі магчымасць бясплатна перасаджвацца ў бліжэйшыя аўтобусы на беларуска-польскай мяжы. Нагадаем, раней людзі, каб не чакаць дні ў чарзе і перасесці бліжэй да шлагбаума, плацілі кіроўцам дадаткова 30-50 еўра.
«У сувязі з працяглым праходжаннем дзяржаўных межаў Беларусі і Польшчы ў напрамку Варшавы прадпрыемства «Менсктранс» арганізоўвае бясплатную перасадку ў аўтобусы прадпрыемства, якія стаяць наперадзе, пры наяўнасці вольных месцаў для пасажыраў, што накіроўваліся да памежнага пункта «Берасце» («Цярэспаль») на аўтобусе «Менсктранса», – гаворыцца ў паведамленні.
У выпадку непрадбачаных сітуацый («адмова браць пасажыраў, узяцце паўторнай аплаты і гэтак далей») кампанія просіць пісаць у месенджар на нумар +375298635131 і дадаваць у паведамленні дату, час і нумар аўтобуса.
Пад выглядам пасажыра «Белсат» патэлефанаваў на гарачую лінію «Менсктранс», каб удакладніць, як гэтая сістэма будзе працаваць.
«У нас былі такія выпадкі, што аўтобус толькі пад'ехаў на мяжу і людзі ўжо жадаюць перасесці, але тады кіроўцы не перасаджваюць. Калі масавая затрымка на мяжы і стаяць усе аўтобусы, то пры наяўнасці вольных месцаў мы можам перасадзіць. Але калі аўтобус толькі падʼехаў і невялікая затрымка, то перасадкі не будзе. Усе кіроўцы абвешчаныя. Людзі будуць перасаджвацца па жывой чарзе – хто падышоў першы, той і сядзе», – растлумачылі на гарачай лініі.
Якая затрымка будзе лічыцца масавай, каб пасажыры маглі перасаджвацца, там пакуль не вызначыліся.
Калі глядзець на чаты мяжы ў Тэлеграм, то здаецца, што людзі пакуль пра такую магчымасць не даведаліся: амаль усе паведамленні датычацца «вазьму спадарожнікаў», «ці можна везці нешта» і «прапаную легкі заробак».
Паводле Памежнага камітэта Беларусі, па стане на 14:00 у пункце пропуска «Берасце» чакаюць выезду з Беларусі ў Польшчу 24 аўтобусы і 500 легкавікоў. Частка рэйсаў пераносіцца з-за доўгага чакання.
Тэса Анэйда, Дар'я Форман belsat.eu
