Амерыканскі інстытут вывучэння вайны (ISW) апублікаваў даклад, прысвечаны расейскаму ўварванню ва Украіну. Паводле дадзеных даследчыкаў, украінскія войскі здолелі спыніць першапачатковую кампанію Мінабароны РФ, накіраваную на правядзенне паветрана-дэсантных і сухапутных аперацый па захопу Кіева, Харкава, Адэсы і іншых буйных украінскіх гарадоў з мэтай дамагчыся змены ўлады ва Украіне, піша «Вот Так».
Расейскія сілы працягваюць прасоўвацца ў некаторых частках тэатру вайсковых дзеянняў, але наўрад ці змогуць захапіць прызначаныя мэты, бо замест распрацоўкі плана новай кампаніі і падрыхтоўкі для яе рэсурсаў Мінабароны накіроўвае сілы на ўтрыманне невялікіх груп падмацаванняў, пішуць аналітыкі ISW (Institute for the Study of War).
ISW мяркуе, што нават канчатковае падзенне Марыупалю наўрад ці вызваліць дастаткова баявой моцы Расеі, каб рэзка змяніць ход вайны ў свой бок. Блакада Марыупалю і рэгулярныя баі ў самім горадзе адымаюць у расейскіх войскаў занадта шмат рэсурсаў, што падрывае іх першапачатковыя планы па наступу на Крывы Рог з наступным захопам Запарожжа і Дняпра з захаду. Пры гэтым даследчыкі лічаць, што на гэтым этапе захоп гэтых гарадоў бачыцца ўжо малаверагодным.
Адносны поспех можа мець аперацыя Расеі па высадцы ў Адэсе. Там можа быць выкарыстаная марская пяхота, якая ўваходзіць у склад Чарнаморскага флоту ды, імаверна, з’яўляецца найбуйнейшым расейскім ваенным рэзервам, які яшчэ не прымаў удзелу ў кампаніі. Большая частка гэтай марской пяхоты пагружаная на дэсантныя караблі ля ўзбярэжжа Адэсы з пачатку вайны і гатовая высадзіцца, як толькі будзе запэўненая надзейная наземная лінія сувязі з Крыму ў Адэсу.
ISW піша, што расейскае ўварванне ва Украіну заходзіць у тупік, але пры гэтым удакладняе, што гэты тупік будзе «вельмі жорсткім і крывавым, асабліва калі ён зацягнецца».
«Тупік – гэта не перамірʼе і спыненне агню. Гэта стан вайны, пры якім кожны бок праводзіць наступальныя аперацыі, прынцыпова не змяняючы становішча. Гэтыя аперацыі могуць быць вельмі разбуральнымі і прывесці да велізарных ахвяр», — тлумачаць даследчыкі ў высновах дакладу.
