Ва Ушачах улады падарвалі гістарычны млын. У планах – і іншыя помнікі мінуўшчыны
Міністэрства ўнутраных справаў Беларусі 16 ліпеня апублікавала відэа падрыву старога млына ў гарадскім пасёлку Ушачы Віцебскай вобласці. Узарвалі будынак работнікі пажарнага аварыйна-выратавальнага атраду Віцебскага УМНС.
«Падраздзяленні МНС аказваюць дапамогу ў ліквідацыі неэксплутаваных будынкаў і збудаванняў», – пракаментавалі ў ведамстве ліквідацыю аб’екту.
Млын быў пабудаваны на мяжы ХІХ і ХХ стагоддзяў, але ахоўнага статусу так і не атрымаў.
Як адзначае «Наша Ніва», у Віцебскай вобласці назіраецца цэлая кампанія падрыву ўсяго старога. Гэтак, у Асвеі быў падарваны мураваны будынак, у вёсцы Двор Гомель і Арэхаўску – сядзібы, пад Полацкам – вайсковыя казармы.
У Смалянах (Аршанскі раён) увосень плануецца знесці два будынкі 1880 і 1901 гадоў пабудовы. Грошы на іх утрыманне выдаткоўваць не плануюць, а вось 16 тысяч рублёў на знос запланаваныя.
Якуб Хруст belsat.eu
