З пачатку вайны з Украіны з’ехалі блізу 5 мільёнаў асобаў, паведаміў «Белсату» кіраўнік Усеўкраінскай асацыяцыі кампаніяў міжнароднага працаўладкавання Васіль Васкабойнік. Ён адзначыў, што пераважна выязджаюць жанчыны і дзеці, і на час вайны такая эміграцыя выгодная для ўкраінскай дзяржавы.
Бальшыня, каля 4 мільёнаў, украінцаў выехала ў ЕЗ. У Нямеччыне статус часовай абароны атрымалі блізу 1,1 мільёна ўцекачоў, у Польшчы – 950–970 тысячаў, у Чэхіі – 350–370 тысячаў.
«І, паводле розных ацэнак, на тэрыторыі краіны-акупанта, Расеі, ды ейнага памагатага, Беларусі, перабываюць каля 1–1,2 мільёна ўкраінцаў. Аднак гэтым лічбам асабліва няма даверу. Зрэшты, робім выснову: за межамі Украіны цяпер застаюцца 5–5,5 мільёна ўкраінцаў», – сказаў у каментары «Белсату» прэзідэнт Усеўкраінскай асацыяцыі кампаніяў міжнароднага працаўладкавання Васіль Васкабойнік.
Ён адзначыў, што 80 % тых, хто ўцёк ад вайны, – жанчыны і дзеці. Іхная міграцыя, пакуль канфлікт не спынены, выгодная для дзяржавы, упэўнены эксперт:
«Гэта паслабленне для нашай сістэмы сацыяльнай абароны. Украінская дзяржава не мусіць клапаціцца, забяспечваць гэтых людзей, напрыклад, выплатамі ў сувязі з беспрацоўем. Зразумела, што гэта палягчае ціск на ўкраінскі бюджэт».
Адначасова такая міграцыя вельмі небяспечная для будучыні краіны, калі настане час пасляваеннага ўзнаўлення. Існуе пагроза, што ўкраінкі за мяжою адаптуюцца, сацыялізуюцца, вывучаць мовы, знойдуць высокапрыбытковую працу – «і яны стануць магнітам для мужчынаў», якія пасля заканчэння вайны і адкрыцця межаў паедуць на Захад у пошуках працы.
«І тут асноўная праблема, што паўстане перад украінскай дзяржаваю, дзе ўз’яднаюцца сем’і мігрантаў? Мы б хацелі, каб гэта адбылося на тэрыторыі нашай краіны. Аднак трэба быць рэалістамі: на жаль, да паловы тых, хто цяпер за мяжою, наўрад ці вернуцца ва Украіну», – канстатаваў Васкабойнік.
Галоўным выклікам для ўладаў пасля вайны ён назваў недахоп працаўнікоў, і найперш – будаўнікоў.
«5-10 гадоў пасля заканчэння вайны галоўнымі драйверамі развіцця ўкраінскай эканомікі будзе сфера будавання, развіцця інфраструктуры. Адпаведна, гэта будзе самым моцным болем нашага ўраду, бо фізічна будзе не ставаць працоўных рук», – сказаў эксперт, які зазначыў, што і да вайны Украіне бракавала будаўнікоў.
Васкабойнік падсумаваў, што, на ягоную думку, да канца вайны жанчыны і дзеці мусяць заставацца ў бяспецы за мяжою, але пасля «ўрад мусіць быць гатовым да таго, каб максімальна спрыяць вяртанню ўкраінцаў». А дзеля аднаўлення краіны давядзецца прывабліваць багата замежнікаў.