Прадстаўніцтва Еўразвязу ў Беларусі ў Сусветны дзень свабоды прэсы выступіла з заявай з нагоды сітуацыі са свабоднымі СМІ ў нашай краіне.
У сваёй заяве Прадстаўніцтва Еўразвязу ў Беларусі нагадала пра «важнасць свабодных і незалежных сродкаў масавай інфармацыі і пра ключавую ролю журналістаў і працаўнікоў СМІ».
«Урад, які забараняе свабодныя СМІ, – гэта ўрад, які не давярае свайму народу праўду. У 2025 годзе Беларусь займала 166-е месца са 180 краін у рэйтынгу Сусветнага індэксу свабоды прэсы. Журналісты і работнікі СМІ сістэматычна робяцца ахвярамі пераследу, іх пазбаўляюць волі па сфабрыкаваных абвінавачаннях, а таксама пераследуюць іх родных і сяброў. Ім выносяць бесчалавечныя прыгаворы – да 14 гадоў пазбаўлення волі толькі за тое, што яны выконваюць сваю працу», – гаворыцца ў заяве.
Акрамя таго, Прадстаўніцтва Еўразвязу выступіла з патрабаваннем, каб Беларусь выконвала свае міжнародныя абавязанні ў забеспячэнні свабоды і незалежнасці прэсы.
,,«Усе палітычныя вязні павінны быць вызваленыя», – такімі словамі завяршаецца заява.
Нагадаем, што 3 траўня адзначаецца Сусветны дзень свабоды прэсы. Да гэтай даты міжнародная праваабарончая арганізацыя «Рэпарцёры без межаў» апублікавала штогадовы Індэкс свабоды прэсы. Яго галоўныя тэзісы пераказала Беларуская асацыяцыя журналістаў. Згодна з індэксам, Беларусь сёлета заняла 166-е месца сярод 180 краінаў.
У 2024 годзе ў нашай краіны было 167-е месца. Але не трэба спяшацца радавацца, папярэджвае БАЖ, бо гэта адбылося ў сувязі з тым, што Азербайджан рэзка пагоршыў свой рэйтынг (адразу на тры пункты), прапусціўшы нашую краіну наперад.
Раман Шавель belsat.eu
