Журналісты-расследавальнікі сцвярджаюць, што зніклая спікерка Каардынацыйнай рады Анжаліка Мельнікава сустракалася і лятала ў адпачынак з чалавекам, які, імаверна, працаваў у ГРУ Беларусі і меў пашпарт прыкрыцця на іншае прозвішча.
Зніклая напрыканцы сакавіка спікерка Каардынацыйнай рады Анжаліка Мельнікава магла мець рамантычныя дачыненні з мужчынам, які аказаўся агентам спецслужбаў Беларусі, заявілі ў супольным расследаванні польскае выданне «Polityka» і расейскае выданне «The Insider». Паводле іх, каханкам аказаўся 32-гадовы Аляксей Вітальевіч Лабееў, які меў пашпарт прыкрыцця на імя Аляксея Гардзеева. У расследаванні бралі ўдзел таксама Беларускі расследавальніцкі цэнтр, «ByPol» і «Кіберпартызаны».
Журналісты-расследавальнікі высветлілі, што ў 2023 годзе была аформленая супольная рэзервацыя квіткоў з Масквы на Кубу і назад на прозвішчы Лабеева і Мельнікавай. Нехта зрабіў рэзервацыю адразу на два квіткі, а пасля купіў яшчэ квіткі маці Мельнікавай на той самы рэйс, кажа Цімур Алеўскі, і яны ўтрох мусілі ляцець з Масквы на Кубу. Вяртацца трэба было 5 верасня, а 6-га Анжаліка мела выступаць на Эканамічным форуме ў Карпачы, і, мабыць, з гэтай прычыны яна адмяніла тую паездку. Але ў студзені 2024 года яна апынулася на Шры-Ланцы, і ў той жа час там таксама быў афіцэр ГРУ Лабееў.
Чаму ўлады Беларусі не хваляцца спецаперацыяй? І дзе цяпер можа быць экс-спікерка Каардынацыйнай рады Анжаліка Мельнікава? Цімур Алеўскі, шэф-рэдактар «The Insider» і адзін з суаўтараў расследавання «Анжаліка і тайны агент. Як каханне пагубіла спікерку беларускай апазіцыі» лічыць, што Мельнікава можа хавацца як ад польскіх, так і ад беларускіх спецслужбаў. Падрабязна пра новае расследаванне «The Insider» журналісты «Белсату» пагутарылі з Цімурам Алеўскім у жывым эфіры.
«Самае дзіўнае, што ёсць чалавек, які ведае адказы на ўсе пытанні, – кажа Цімур Алеўскі. – Можна ўзяць тэлефон, пазваніць маме Анжалікі Мельнікавай, і калі б яна не была пад асаблівым наглядам, напэўна, яна б лёгка магла патлумачыць, што адбылося з ейнаю дачкою, ці заступілася б за яе. Здавалася б, гэта так лёгка, але выглядае, што яна не можа гэтага зрабіць.
Мы разумеем, што ў справе ёсць рэальная сведка, але пры гэтым мы ўсцяж не разумеем матываў Анжалікі Мельнікавай. Кожнае нашае новае расследаванне змяншае колькасць версіяў, а версіяў можа быць вельмі шмат: напрыклад, Мельнікава працавала на кагосьці, каму быў асабіста непрыемны Павел Латушка; ці яна працавала на трэція спецслужбы; ці яна проста закахалася і не ведала, хто такі Аляксей Лабееў, які атрымаў адпаведную падрыхтоўку, каб уваходзіць у давер да людзей.
,,Магчыма, ён прымусіў яе зрабіць нешта, пасля чаго ёй не было шляху назад. Магчыма, яна збегла ад яго, ці ён яе забіў, ці яна ў Беларусі... Мы не ведаем адказаў на гэтыя пытанні. Але мы ўсё больш дазнаемся пра ейнае жыццё ў апошнія месяцы да знікнення».
Пра імавернага каханка Мельнікавай Аляксея Лабеева вядома не шмат. Нарадзіўся ў сям’і беларускага вайскоўца ў 1993 годзе («BELPOL» пацвердзіў «Белсату» дату нараджэння), скончыў Вайсковы факультэт БДУ. Жыў непублічна, сацсетак не вёў (на старым і закінутым акаўнце ў VK пазначыў, што скончыў Новасібірскі дзяржаўны тэхнічны ўніверсітэт, але ці праўда ён там вучыўся, невядома).
Аднойчы Лабееў трапіў на фота з удзелам беларускіх вайскоўцаў у шпіталі ў Горадні ў 2019 годзе; на тым жа фота быў тагачасны кіраўнік Галоўнага выведнага ўпраўлення Руслан Касыгін.
belsat.eu
