У Магілёўскім дзяржаўным універсітэце імя А. Куляшова загадам Міністэрства адукацыі Беларусі № 116 ад 24 сакавіка 2025 года адкрытая новая спецыяльнасць – «Фізічная культура. Вайскова-патрыятычнае выхаванне».
Абітурыентаў ужо заклікаюць падаваць заявы. Вучыцца на ваенрукоў запрашаюць як хлопцаў, так і дзяўчат. План прыёму – 20 асобаў.
Універсітэт падпісаў дамову аб супрацы з аблваенкаматам і 188-й гвардзейскай інжынернай брыгадай, што дыслакуецца на ўскрайку Магілёва, на выкарыстанне іх матэрыяльна-тэхнічнай базы. Тут будуць праводзіцца заняткі страявога рыхтавання, здачы нарматываў афіцэрскіх вайсковых мнагаборстваў, вайскова-палявыя зборы.
Навучальны план новай спецыяльнасці ўключае такія дысцыпліны, як «Дапрызыўнае рыхтаванне і арганізацыя вучэбна-палявых збораў», «Дадоктарская дапамога», «Страявое рыхтаванне», «Правілы пажарнай бяспекі», «Паводзіны чалавека ў экстрэмальнай сітуацыі», «Методыка вайскова-патрыятычнага выхавання», «Агнявое рыхтаванне» ды іншыя.
Навучанне будзе праходзіць на дзённай форме цягам 4 гадоў. Выпускнікі атрымаюць кваліфікацыю «Выкладчык. Кіраўнік вайскова-патрыятычнага выхавання».
Неабходнасць стварэння новага кірунку навучання дэкан факультэту фізічнага выхавання МДУ імя А. Куляшова Уладзімір Шутаў патлумачыў патрэбаю ў кадрах, што з’явілася пасля таго, як у 2021 годзе ў школах Беларусі была ўведзеная пасада кіраўніка вайскова-патрыятычнага выхавання. Цяпер займаць яе маюць права толькі былыя вайскоўцы з педагагічнай адукацыяй або спецыялісты з вышэйшай педагагічнай адукацыяй, якія адслужылі ва Узброеных сілах.
,,«У савецкія гады ў нашым універсітэце працавала вайсковая кафедра, што рыхтавала намеснікаў дырэктараў школаў у справе пачатковага вайсковага рыхтавання. Таму Міністэрства адукацыі даручыла нам арганізаваць пілотны праект і падрыхтаваць дакументы для адкрыцця гэтай спецыяльнасці. З мінулага года мы ўвялі прафілізацыю для вайскова-патрыятычнага выхавання, цяпер паводле яе навучаецца 21 студэнт. З гэтага года ўводзіцца новая, падвойная спецыяльнасць. Выпускнікі змогуць працаваць як настаўнікамі фізкультуры, так і кіраўнікамі вайскова-патрыятычнага выхавання», – распавёў дэкан.
На сённяшні дзень універсітэт у Магілёве – адзіная ў Беларусі ВНУ, што будзе рыхтаваць ваенрукоў.
Акрамя таго, студэнты шэрагу спецыяльнасцяў універсітэту паралельна з асноўным навучаннем паводле праграмы супрацы з Беларуска-Расейскім універсітэтам могуць навучацца на міжуніверсітэцкай вайсковай кафедры. Падчас выпуску яны атрымаюць афіцэрскае вайсковае званне і дыплом вайскова-ўліковай спецыяльнасці з магчымасцю далейшага падпісання кантракту з Міністэрствам абароны.
Марыя Міхалевіч belsat.eu
