Аляксандр Лукашэнка 1 красавіка падпісаў указ № 139 «Аб рэалізацыі інвестыцыйнага праекту», што нібыта прывядзе ў краіну 5G-сувязь.
Паводле дакументу на сайце Лукашэнка, сетка сотавай электрасувязі паводле тэхналогіі IMT-2020 будзе створаная цягам 2025–2034 гадоў. Міжнародныя стандарты мабільнай сувязі-2020 (стандарт IMT-2020) – гэта патрабаванні, што выпусціў Сектар радыёсувязі Міжнароднага звязу электрасувязі ў 2015 годзе для сетак, прылад і паслуг паводле тэхналогіі 5G.
«У выніку рэалізацыі праекту плануецца павышэнне даступнасці і якасці мабільнай сувязі і хуткасці інтэрнэту за кошт актыўнага ўкаранення тэхналогіі 5G і павелічэння ахопу тэрыторыі краіны сувяззю паводле тэхналогіі LTE», – піша прэс-служба Лукашэнкі.
Інвестарам у дакуменце пазначанае ТАА «Белорусские облачные технологии», для якога створаныя вельмі камфортныя ўмовы. Напрыклад, зямельныя ўчасткі для будаўніцтва і абслугоўвання аб’ектаў адзінай сеткі і інфраструктуры даюцца ў арэнду цягам 99 гадоў без правядзення аўкцыёну і платы за арэнду, інвестыцыйная дамова падпісваецца без правядзення фінансава-эканамічнай ацэнкі праекту, падаткі на перыяд да 31 снежня 2034 года плаціць таксама не трэба.
Тэса Анэйда / belsat.eu
