Гэтая субота абяцае быць насычанай і натхняльнай! Кацярына Раецкая і Дзяніс Дудзінскі запрашаюць вас на эфір, поўны цікавых тэмаў, культурніцкіх падзеяў і нечаканых адкрыццяў.
Нашая здымачная група зазірнула за кулісы Вольных Купалаўцаў. Пакажам і раскажам, як прайшлі паказы іхных спектакляў ды паразмаўляем з рэжысёрам і акторам Аляксандрам Гарцуевым.
У госці ў студыю да нас завітае Аляксандра Гушча, культурніцкая менеджарка, якая стварыла ў Варшаве беларускую бібліятэку «Жыветэка». Паразмаўляем пра ейны праект, як яна пачынала, збіраючы беларускія кнігі. Што трэба, каб стварыць асабістую беларускую палічку? Якія аўтары і кнігі найбольш запатрабаваныя сярод беларускіх чытачоў?
Паразмаўляем з пісьменніцаю Святланаю Курс пра поспех ейнай кнігі «Па што ідзеш, воўча?». Ці можа замежнік зразумець Беларусь і як яго зацікавіць магічным беларускім светам?
Экспертка ў галіне публічных выступаў Валянціна Чэкан падзеліцца сакрэтамі эфектыўных прэзентацыяў і адкажа, як прыцягнуць увагу слухачоў нават у самых складаных абставінах.
Паспрабуем вызначыць самае прыгожае месца для вясновых фотасесіяў у Беларусі.
Далучайцеся да «Раніцы з «Белсатам». Будзе цікава!
