На нарадзе 4 красавіка Лукашэнка крытыкаваў эфектыўнасць выдаткаў на спорт. Адной з праблемаў ён назваў тое, што чыноўнікі ўтрымліваюць на дзяржаўныя грошы сваіх родных, блізкіх і каханак.
Аляксандр Лукашэнка правёў 4 красавіка нараду на тэму падтрымкі спорту і культуры. Цытаты з нарады апублікавала ягоная прэс-служба. Найбольш Лукашэнку непакоіла эфектыўнасць выдаткаў на спорт, асабліва на гульнявыя віды. Ён выказаў упэўненасць: «Калі б мы пайшлі заходнім шляхам, сёння б спорту ў краіне не было». Але і тое, куды прывёў спорт ягоны ўласны шлях, Лукашэнку таксама не спадабалася.
Ён прызнаў, што беларусы паказваюць добрыя вынікі толькі ў асобных відах спорту, як то ў скачках на батуце, мастацкай гімнастыцы, веславанні на байдарках і каноэ, барацьбе. Дадаў: «Мы чакаем перамог і ў іншых відах». Заўважыў, што перамогі хакейнага «Дынама» – выключэнне з правіла. Параіў хакеістам «веславаць двума вёсламі». Маўляў, у народу пытанні, «калі нашыя каманды перастануць калекцыянаваць паразы».
Дамагацца перамог Лукашэнка вырашыў паводле прынцыпу «даяце вынік – атрымліваеце грошы, няма выніку – няма грошай». Дадаў: «Як хочаце мяне разумейце».
Адной з праблемаў ён назваў карупцыю:
,,«Па-мужчынску, нягледзячы на Наташу, што яна тут прысутнічае, хачу сказаць, што родных, блізкіх, каханак, яшчэ кагосьці вы, калі ласка, утрымлівайце за свае грошы».
З тэксту прэс-службы Лукашэнкі неадназначную цытату падкарэктавалі: прыбралі згадку Наташы. На відэа ананімнага Telegram-каналу «Пул первого», які публікуе цытаты Лукашэнкі раней за афіцыйную прэс-службу, рэмарку пра Наташу чуваць.
Лукашэнка казаў, імаверна, пра сваю прэс-сакратарку Наталлю Эйсмант – адзіную жанчыну за сталом. З кантэксту зразумела, што Лукашэнка меў на ўвазе тое, што размова пра ўтрыманне каханак мае адбыцца між «мужыкамі». Але цытату маглі скарэктаваць праз тое, што Эйсмант часам называлі ў ліку каханак самога Лукашэнкі. Доказаў інтымнай сувязі Лукашэнкі і Эйсмант няма, ды й Лукашэнка агулам любіць атачаць сябе маладзейшымі дзяўчынамі.
Больш за 30 гадоў таму Лукашэнка прыйшоў да ўлады на антыкарупцыйных лозунгах, ды яго самога нярэдка вінавацяць у карупцыі: вакол ягонай сям’т вырасла бізнес-імперыя, сам ён карыстаецца мноствам палацаў, а Беларусь за Лукашэнкам засталася карумпаванай. У рэйтынгу ўспрымання карупцыі за 2024 год Беларусь апусцілася ніжэй за Украіну, устала на адной ступені з Босніяй і Герцагавінай, Лаосам, Манголіяй, Панамай, Філіпінамі і Сьера-Леонэ.
Алесь Наваборскі belsat.eu
