З 10 красавіка адна паездка аўтобусам, тралейбусам ці трамваем у Менску будзе каштаваць ужо не 85, а 95 капеек. Менскі гарвыканкам заяўляе, што стварыў новы від праязнога дакументу, але насамрэч толькі мадыфікаваў дзённыя праязныя.
Менскі гарвыканкам пастанавіў змяніць тарыфы на праезд у грамадскім транспарце. Рашэнне афіцыйна апублікавалі 4 красавіка, набудзе моц 10 красавіка. Пастанова ў асноўным павялічвае цэны на праезд у аўтобусах, тралейбусах і трамваях.
Разавы праезд даражэе з 85 да 95 капеек. Пры продажы кіроўцам разавы квіток будзе каштаваць ужо не 90 капеек, а 1 рубель.
Вырастуць і цэны на доўгатэрміновыя праязныя. Напрыклад, праязны на месяц на адзін від наземнага транспарту на месяц будзе каштаваць Br 42,75 замест ранейшых Br 38,25, а праязны на месяц на аўтобус, тралейбус, трамвай і метро – Br 56,97 замест Br 51,05.
Праезд на метро падаражае з 90 капеек да 1 рубля. Цэны шматразовыя праязныя на метро таксама вырастуць: напрыклад, праязны на 10 паездак падаражае з Br 8,55 да Br 9,50, праязны на месяц толькі на метро – з Br 40,5 да Br 45.
Заяўлены Менскім гарвыканкамам новы «турыстычны» праязны – гэта змена правілаў адносна ранейшых дзённых праязных. Раней можна было купіць квіток на тры віды наземнага транспарту на адзін, два ці тры дні (за Br 4,20, Br 7,43 і Br 10,23 адпаведна), цяпер можна будзе купіць праязны на тры наземныя віды плюс метро на дзень або тры дні (за Br 4,81 і Br 14,43 адпаведна). Знікне магчымасць купіць квіток на два дні і квіткі на дзень або тры на толькі наземны транспарт без метро.
Новыя праязныя ў пастанове называюцца турыстычнымі, але нідзе ў дакуменце не пазначана, што імі не могуць карыстацца сталыя жыхары Менску.
Алесь Наваборскі belsat.eu
