Мясцовыя ўлады сцвярджаюць, што Расея ўдарыла па Крывым Розе балістычнаю ракетаю. Удар прыйшоўся па жылым квартале.
Увечары 4 красавіка ва ўкраінскім Крывым Розе адбыўся магутны выбух. Перад гэтым мясцовыя Telegram-каналы паведамлялі, што на горад ляціць расейская ракета.
Кіраўнік гарадской абароны Аляксандр Вілкул паведаміў, што ракета трапіла ў цэнтр жылога мікрараёну. На момант ягонага паведамлення было вядома пра 12 забітых і больш за 50 параненых. Кіраўнік Днепрапятроўскай вобласці Сяргей Лысак назваў тыя ж звесткі, дадаўшы, што трое забітых – дзеці. У горадзе пашкоджаныя шматпавярховыя будынкі, гараць машына і гараж.
Абноўлена. Лысак паведаміў пра 16 загінулых, шасцёра з іх – дзеці. Паводле Вілкул расказаў, што каля месца ўдару была дзіцячая пляцоўка. Кіраўнік Цэнтру супрацьдзеяння дэзынфармацыі Андрэй Каваленка расказаў, што, паводле папярэдніх звестак, па Крывым Розе ўдарыла ракета «Іскандэр» з касетнай боегалоўкай.
Прэзідэнт Украіны Уладзімір Зяленскі напісаў:
«Штодня расейскія ўдары. Штодня гінуць людзі. Існуе толькі адна прычына, чаму гэта працягваецца: Расея не хоча спынення агню, і мы гэта бачым. Увесь свет бачыць. Кожная ракета, кожны ўдарны дрон даказваюць, што Расея хоча толькі вайны. І толькі ад ціску свету на Расею, ад усіх намаганняў дзеля ўмацавання Украіны, нашай СПА, нашых сілаў – толькі ад гэтага залежыць, калі скончыцца вайна. Амерыка, Еўропа, усе іншыя ў свеце маюць дастатковыя магчымасці, каб прымусіць Расею адмовіцца ад тэрору і вайны. І гэта трэба забяспечыць: мір патрэбны».
Гэта далёка не адзіны ўдар расейскіх войскаў па Украіне за гэты дзень. Уначы беспілотнікі ўдарылі па Броварскім раёне каля Кіева, былі параненыя дзве асобы. У Херсоне артылерыя трапіла па шматпавярховых дамах, лякарні і ўстанове адукацыі, быў паранены адзін чалавек.
Ад начной атакі па Касцянтынаўцы загінуў адзін мірны жыхар, трое былі параненыя. Ад удару па Харкаве ўвечары 3 красавіка загінулі чатыры асобы, былі параненыя 32.
Алесь Наваборскі belsat.eu
