У сакавіку розніца між пакупкай і продажам валюты фізічнымі асобамі істотна вырасла. Магчыма, беларусы чакалі росту долара.
У студзені – сакавіку фізічныя асобы ў Беларусі прадалі больш замежнай валюты, чымся купілі, на $ 48,9 млн у эквіваленце, вынікае са звестак Нацыянальнага банку. Прытым наяўнай валюты здалі на 424,2 млн больш, чымся купілі, а безнаяўнай, наадварот, купілі на 375,3 млн больш, чымся здалі.
Гэта невялікая розніца ў маштабах усяго аб’ёму гандлю валютамі: за першыя тры месяцы 2025 года ў Беларусі купілі замежнай валюты на $ 2,9637 млрд і купілі на $ 3,0125 млрд.
Юрыдычныя асобы куплялі валюты больш, як прадавалі: за тры месяцы купілі на $ 7,881 млрд, прадалі на $ 7,212 млрд.
Адметна іншае. Звычайныя беларусы паскорылі продаж валюты. Сальда продажу валюты фізічнымі асобамі склала толькі за сакавік $ 41 млн (пры $ 48,9 млн за тры месяцы). Юрыдычныя асобы тым часам закупаліся валютаю: за сакавік пакупка валюты перавысіла продаж на $ 161,5 млн.
Нацбанк не каментаваў гэтай статыстыкі. Чаму беларусы здавалі валюту ў студзені – сакавіку, невядома. Але яшчэ ў любым у Беларусі заўважалі, што пункты абмену валютаў прадавалі долары паводле заніжаных адносна курсу Нацбанку цэнаў. У той жа час хадзілі чуткі, што ў абменніках шэрагу турыстычных краінаў сталі часцей адмаўляцца прымаць долары старых узораў. Магчыма, беларусы таксама чулі пра жаданне прэзідэнта Злучаных Штатаў Доналда Трампа аслабіць долар, каб зрабіць вонкавы гандаль выгаднейшым.
Долар ЗША ўпаў у пятніцу 4 красавіка да шасцімесячнага мінімуму ў дачыненні еўра, пры гэтым японская іена ўмацавалася да шасцімесячнага максімуму.
Да ўвядзення амерыканскіх мытаў супраць амаль усяго свету прагнозы для долара былі аптымістычныя: насуперак жаданню Трампа аслабіць долар аналітыкі не чакалі моцнага падзення курсу. Яшчэ за дзень да ўвядзення тых мытаў прагназавалі, што курс долара стабілізуецца найбліжэйшымі месяцамі. Ды мыты, насуперак звычайнай эканамічнай логіцы, не ўзмацнілі, а аслабілі долар, бо ад маштабных мытаў чакаецца маштабны спад амерыканскай эканомікі.
У частцы курсу долара выйшла тое, чаго хацеў Трамп. Але агулам эканоміка ЗША пакуль рэагуе не так, як той абяцаў. Ды ён супакойваў у сваёй сацсетцы Truth Social: «Аперацыя завершаная! Пацыент выжыў і папраўляецца. Прагноз: пацыент стане мацнейшы, большы, лепшы і як ніколі ўстойлівы». Гэтая публікацыя была зробленая да таго, як Кітай адказаў сваймі мытамі на амерыканскія.
Ва ўмовах пагрозы сусветнай гандлёвай вайны прадказаць далейшыя курсы валютаў практычна немагчыма, але прынамсі ў першы час пасля новых амерыканскіх мытаў давер да долара пахіснуўся.
Алесь Наваборскі belsat.eu
