Юля Шаўчук, акторка і рэжысёрка Беларускага Вольнага Тэатру, расказала «Белсату» пра лёс тэатру за мяжой, творчыя планы і новую «правакацыйную» п’есу.
На пытанне пра тое, ці цяжка зрэалізаваць свой творчы патэнцыял за мяжою, Юля адказвае адназначна – безумоўна цяжка.
– Цяжка быць эмігрантам, а працаваць у прафесіі ў эміграцыі – увогуле раскоша! Тым больш, што тэатр – спецыяльнасць асаблівая, тонкая, – рэзюмуе яна.
Але як бы ні было цяжка, эміграцыя вымушае цябе рухацца наперад і глядзець на сусвет больш шырока.
– Мы вельмі доўга сядзелі ў сваёй беларускай бурбалцы, і ў нейкі момант ты сам разумееш, што прыходзіць момант інтэгравацца і размаўляць, выходзіць на палякаў, а не толькі на беларусаў. Рабіць тое, чаго яны не бачылі. То бок рабіць не толькі пра сябе, няшчасны лёс і 2020-ы, усе стаміліся ад гэтай тэмы. Калі ты хочаш быць цікавым, трэба рабіць нешта новае, – кажа Юля Шаўчук.
Таксама рэжысёрка адсунула заслону таямніцы на тое, што цяпер рыхтуе Беларускі Вольны Тэатр для сваіх гледачоў. Паводле яе, ужо ідзе падрыхтоўка новай п’есы пра размову беларуса з палякам, якая будзе «выбуховай» і «правакацыйнай». П’еса мае выйсці ўжо сёлета.
– Паралельна ў нас ідзе супраца з беларускімі і ўкраінскімі падлеткамі, з імі таксама будуць праекты, – падкрэсліла яна.
Нагадаем, 29 сакавіка ў Музеі Вольнай Беларусі ў Варшаве можна будзе паглядзець спектакль «Onyx» Беларускага Вольнага Тэатру — пра шалёнае жыццё менскіх падлеткаў на пачатку 90-х. Уваход вольны, але патрэбная папярэдняя рэгістрацыя.
Тэса Анэйда / belsat.eu
