Дарадца Святланы Ціханоўскай у парламенцкай супрацы і канстытуцыйнай рэформе Анатоль Лябедзька сустрэўся ў Кіеве з дарадцам кіраўніка Офісу прэзідэнта Украіны Міхайлам Падаляком. Пра што размаўлялі?
«Як заўсёды, гэта фармат шчырай размовы з элементамі кансультацыяў», – так пра сустрэчу сказаў Анатоль Лябедзька «Парламенцкаму Каналу» ў Telegram.
Дарадца Святланы Ціханоўскай у парламенцкай супрацы і канстытуцыйнай рэформе прызнаўся, што падчас сустрэчы з дарадцам кіраўніка Офісу прэзідэнта Украіны Міхайлам Падаляком намагаўся зразумець, колькі месца ў працоўным графіку Уладзіміра Зяленскага займае Беларусь:
,,«Дык вось, як сцвярджае Падаляк, Лукашэнка ва ўкраінскай палітыцы – у межах статыстычнай хібнасці. А вось будучыня Беларусі – гэта тое, што рэальна прысутнічае ў галаве ўкраінскага прэзідэнта. Тут ёсць разуменне, што без дэмакратычнай Беларусі не будзе бяспечнай Еўропы».
Суразмоўцы таксама абмеркавалі становішча беларускіх добраахвотнікаў ва Украіне:
«Дарадца ўкраінскага прэзідэнта адзначыў пэўныя зрухі і змены ў прававым становішчы беларускіх добраахвотнікаў ва Украіне і выказаў спадзеў, што гэты працэс будзе мець пазітыўную дынаміку. Таксама адзначыў, што прэзідэнт Украіны мае мэту вярнуць з расейскіх вязніцаў усіх палонных, якія змагаліся за свабоду Украіны, не зважаючы, якой яны нацыянальнасці».
Агенцтва «Позірк» піша, што ў Кіеве Лябедзька бярэ ўдзел у паседжанні круглага стала «Беларуска-ўкраінскія стасункі: выклікі і магчымасці». Беларусь там рэпрэзентаваная таксама кіраўніцаю міжнароднай камісіі Каардынацыйнай рады Аляксандрай Мамаевай, лідаркаю фракцыі КР «Хопіць баяцца!» Таццянай Мартынавай, прадстаўніком Аб'яднанага пераходнага кабінету ў абароне Вадзімам Кабанчуком і кіраўніком апарату Кабінету Валерам Мацкевічам.
З украінскага боку ўдзел у сустрэчы бяруць дэпутаты Вярхоўнай Рады, прадстаўнікі ўраду, аналітычных цэнтраў і валанцёрскіх ініцыятываў.
На мінулым тыдні Каардынацыйная рада ўхваліла зварот да Украіны з просьбаю залучыць беларускіх грамадзянаў у спісы на абмен палоннымі з Расеяй, прычым у незалежнасці ад таго, у Беларусі ці Расеі яны зняволеныя.
Ідзецца пра людзей, якія ладзілі акты супраціву, каб перадухіліць перасоўванне тэхнікі і жывой сілы, што была задзеяная ў нападзе на Украіну з тэрыторыі Беларусі. Таксама ў спісах на абмен маюць быць тыя, хто зазнаў пераслед за антываенную пазіцыю і каментары з асуджэннем расейскай агрэсіі, за данаты ЗСУ і беларускім добраахвотнікам, за перадаванне звестак пра перасоўванне расейскай тэхнікі ініцыятыве «Беларускі Гаюн», а таксама за ўдзел у беларускіх фармаваннях у складзе ЗСУ.
Акрамя таго, КР заклікала прызнаць усіх беларусаў, якія ваявалі і ваююць на баку Украіны, камбатантамі, якім гарантаваная абарона ў адпаведнасці з міжнародным гуманітарным правам.
Гэты зварот падтрымаў Пераходны кабінет. Заяву меліся перадаць у парламент Украіны.
Сцяпан Кубік belsat.eu
