На Мюнхенскай канферэнцыі бяспекі прэзідэнт Украіны акрэсліў, дзе, паводле яго, мае прайсці мяжа «паміж вайною і мірам», а фактычна – паміж Расеяй і Захадам, перадае карэспандэнт «Белсату». Як сказаў Уладзімір Зяленскі, у гэтую лінію бяспекі патрэбна залучыць усходнюю мяжу Беларусі.
«У пэўны момант будзе мяжа паміж вайною і мірам. Дзе яна пройдзе і наколькі трывалаю будзе, залежыць ад нас. Мая прапанова – украінская ўсходняя мяжа, беларуская ўсходняя мяжа, усходнія межы балтыйскіх дзяржаваў, усходняя мяжа Фінляндыі. Гэта самая бяспечная лінія для ўсіх нас у Еўропе, бо гэта лінія міжнароднага права», – заявіў Уладзімір Зяленскі ў праграмнай прамове на Мюнхенскай канферэнцыі бяспекі.
Украінскі прэзідэнт таксама паўтарыў словы з свайго нядаўняга інтэрв'ю выданню «The Economist» пра тое, што Расея рыхтуе новыя дывізіі са 150 тысячамі жаўнераў, і папярэджанне пра пагрозу беларуска-расейскіх вучэнняў, якія плануюцца сёлета:
,,«Гэта тое самае, як яны разварочвалі войскі перад поўнамаштабным уварваннем ва Украіну тры гады таму. Гэтыя расейскія сілы ў Беларусі для нападу на Украіну? Імаверна. А, імаверна, і не. Можа, яны для вас? Дазвольце нагадаць, што Беларусь мяжуе з трыма краінамі NATO, яна стала плацдармам для расейскіх вайсковых аперацыяў».
Спаслаўшыся на заявы Пуціна і Лукашэнкі, Зяленскі адзначыў, што ў Беларусі цяпер маецца «забароненая зброя, ракеты сярэдняй далёкасці і нават ядравая зброя».
«Пуцін выразна разглядае Беларусь проста як іншы рэгіён Расеі. І мы мусім быць рэалістычнымі, калі нехта рыхтуе вайсковы плацдарм, мы мусім спытаць: што нам з гэтым рабіць? І больш важна: што мы можам зрабіць да наступнага ўварвання?» – сказаў прэзідэнт Украіны.
,,«Не падманвайце сябе, паўночныя карэйцы не слабыя. Яны вучацца весці сучасную вайну. А вашыя войскі гатовыя? Калі Расея пачне аперацыю з Беларусі пад фальшывым сцягам ці проста без апазнавальных знакаў, гэтак жа, як забралі Крым у 2014 годзе, як хутка саюзнікі дадуць адказ? І ці дадуць адказ наогул?»
Зяленскі запэўніў, што «верыць у Еўропу», і заклікаў еўрапейцаў «дзейнічаць дзеля саміх сябе».
Сцяпан Кубік belsat.eu
