З ініцыятывы фракцыі «Каманда Латушкі і Рух "За Свабоду"» Каардынацыйная рада ўхваліла зварот да Украіны залучыць беларусаў у спісы на абмен палоннымі з Расеяй. Гэтую заяву скіруюць у Вярхоўную Раду.
Ідэя звароту да Украіны з'явілася ў сувязі з мірнымі перамовамі, што маюць адбыцца паміж Кіевам і Масквою пры ўдзеле ЗША і Еўразвязу, паведамілі «Белсату» ў прэс-службе кіраўніка НАУ Паўла Латушкі.
У заяве на адрас Вярхоўнай Рады адзначаецца, што беларусы ладзілі акты супраціву, каб перадухіліць перасоўванне тэхнікі і жывой сілы, якая была задзейнічаная ў нападзе на Украіну з тэрыторыі Беларусі.
Беларусы зазналі пераслед за антываенную пазіцыю і каментары з асуджэннем расейскай агрэсіі, за данаты ЗСУ і беларускім добраахвотнікам, за перадаванне звестак пра перасоўванне расейскай тэхнікі ініцыятыве «Беларускі Гаюн», а таксама за ўдзел у беларускіх фармаваннях у складзе ЗСУ.
Вязням, якія атрымалі вялікія тэрміны, «пагражаюць катаванні і бесчалавечнае абыходжанне, іхнае здароўе і жыццё пад сур'ёзнай пагрозаю», адзначаецца ў заяве.
На падставе гэтага Каардынацыйная рада папрасіла Кіеў залучыць у спісы на абмен ваеннапалоннымі з Расеяй грамадзянаў Беларусі, якія былі затрыманыя як у нашай краіне, гэтак і ў Расеі, за падтрыманне Украіны.
Акрамя таго, КР заклікала прызнаць усіх беларусаў, якія ваявалі і ваююць на баку Украіны, камбатантамі, якім гарантаваная абарона ў адпаведнасці з міжнародным гуманітарным правам.
Каардынацыйная рада прапануе Аб'яднанаму пераходнаму кабінету падрыхтаваць і зацвердзіць спіс для абмену ваеннапалоннымі, а таксама наладзіць камунікацыю з адпаведнымі органамі ва Украіне, адказнымі за абмен.
Гэты зварот падтрымаў 41 дэлегат, 1 устрымаўся, 2 былі супраць. Фракцыя «Беларусы» ўдзелу ў галасаванні не ўзяла.
Сцяпан Кубік belsat.eu
