Абраная прэзідэнтка пракаментавала прапагандысцкую стужку пра пакуты беларусаў у выгнанні і інфармацыю пра тое, што ўцекачы здымаліся нібыта на замову Офісу.
Заяву Святланы Ціханоўскай апублікавалі ў ейным Telegram-канале. Абраная прэзідэнтка запэўніла, што Офіс «ніколі не будзе рызыкаваць людзьмі»:
,,«Усе ініцыятывы, якія ідуць ад нашага Офісу або пры нашым спрыянні, абавязкова прытрымліваюцца ўсіх прынцыпаў бяспекі: мая каманда не згадвае імёнаў без згоды і не дзеліцца ні з кім вашымі персанальнымі звесткамі».
Ціханоўская адзначыла, што цяпер вельмі важна быць пільнымі:
«Калі вы бераце ўдзел у апытаннях, інтэрв’ю ці праектах дапамогі, удакладняйце, з кім маеце справу. Спраўджвайце, ад каго ідзе ініцыятыва, звяртайцеся да рэдакцыяў, каб праверыць журналіста, з якім камунікуеце. Не саромейцеся казаць „не“, калі нешта выклікае сумнеў. Беражыце сябе, расказвайце іншым пра неабходныя захады бяспекі і не дазваляйце нікому выкарыстоўваць вашай даверлівасці».
Асобам, да якіх нехта звяртаецца з запытам нібыта ад Офісу, Ціханоўская параіла заўсёды спраўджваць гэта праз афіцыйныя каналы сувязі:
- Telegram-бот @AskOffice_Bot (з дзвюма літарамі „f“),
- электронная пошта askoffice@tsikhanouskaya.org,
- мэсэнджар «Signal», кантакт – askoffice_chat.15.
Прэс-сакратарка абранай прэзідэнткі Ганна Красуліна сказала «Белсату», што пра інтэрв'ю, якія апынуліся ў фільме прапагандыстаў, у Офісе не ведалі, і ніхто ў Офіс не звяртаўся наконт гэтых здымкаў і нічога не ўдакладняў.
Падман асобаў, якія сталіся героямі прапагандысцкай стужкі, Святлана Ціханоўская назвала абуральным:
«Выкарыстоўваць людзей ва ўразлівым стане, якія даверыліся знаёмым ці „журналістам“ у спадзяванні атрымаць дапамогу, і ператварыць іхныя гісторыі ў інструмент прапаганды – гэта чарговае сведчанне таго, што рэжым абыякавы да чалавечага жыцця. Людзі, якія апынуліся ў цяжкіх умовах менавіта праз рэжым, заслугоўваюць падтрымання і разумення, а не выкарыстання для „карцінкі“ пра тое, як „дрэнна“ ўцекачам».
Большая частка сюжэтнай лініі прапагандысцкага фільму «Чужое неба» будуецца на гісторыі 37-гадовай настаўніцы з Шклова Юліі Брыкінай. Яна цяпер у Беларусі разам з дзецьмі. Жанчына расказала, што ў эміграцыю паехала за мужам, які пабаяўся палітычнага пераследу. Паведаміла, што не хацела нікуды з’язджаць, але пабаялася, што муж забярэ дзяцей.
Праваабаронца, кіраўнік фонду «BYSOL» Андрэй Стрыжак паведаміў, што 4 сакавіка Станіслаў, муж Юліі, паводле папярэдніх звестак учыніў суіцыд, і прычынаю мог стаць удзел жонкі ў стужцы прапагандыстаў:
«Ейнага мужа Станіслава Брыкіна 4 сакавіка знайшлі мёртвым у лагеры для ўцекачоў у Пабрадзе. Галоўная версія следства – самагубства. Ці ведаў Станіслаў, што ягоная жонка знялася ў прапагандысцкім кіно? Невядома. Ці магла б вестка пра гэта стаць кропкай у ягоным рашэнні? Магла б».
Гэта не першы выпадак падобнага падману прапагандыстаў за апошні час. У студзені ў эфіры тэлеканалу ОНТ паказалі кадры з маршу беларусаў у Варшаве. Аказалася, што з польскім аператарам Рафалам Ганоўскім, які здымаў акцыю, звязаліся ад імя адной з арганізацыяў, якая нібыта працуе са Святланай Ціханоўскай, і ён адправіў свае матэрыялы.
Сцяпан Кубік belsat.eu
