Белтэлерадыёкампанія выпусціла фільм пра цяжкі лёс беларусаў у Польшчы і краінах Балтыі. Амаль усе героі стужкі цяпер за мяжою, і некаторыя з іх сцвярджаюць, што інтэрв'ю былі запісаныя нібыта на замову Офісу Святланы Ціханоўскай, каб уцекачы атрымалі фінансавую дапамогу.
Большая частка сюжэтнай лініі прапагандысцкага фільму «Чужое неба» будуецца на гісторыі 37-гадовай настаўніцы з Шклова Юліі. Яна цяпер у Беларусі разам з дзецьмі. Жанчына расказала, што ў эміграцыю паехала за мужам, які пабаяўся палітычнага пераследу. Паведаміла, што не хацела нікуды з’язджаць, але пабаялася, што муж забярэ дзяцей.
«Наша Ніва» піша, што, падобна, яе адзіную здымалі ў Беларусі, астатнія цяпер за мяжою. Адна з гераінь стужкі заявіла выданню, што апынулася ў фільме прапагандыстаў не з уласнага жадання. Кажа, да яе звярнулася знаёмая з просьбаю ўзяць удзел у здымках відэа для Офісу Святланы Ціханоўскай.
Гэта мелася быць інтэрв’ю для ўнутранага карыстання, каб паказаць патэнцыйным донарам патрэбы людзей, якія апынуліся ў цяжкім матэрыяльным становішчы. Здымалі яшчэ ў кастрычніку летась:
,,«Інтэрв’ю было патрэбнае, каб пасля мне дапамаглі фінансава. Для відэа адмыслова шукалі людзей у патрэбе. Папрасілі быць шчырай і расказаць пра ўсе праблемы. Але мне сказалі, што гэта будзе ананімна».
Іншыя ўцекачы прызналіся, што іхнае з'яўленне ў стужцы сталася шокам. Сцвярджаюць, што «для БТ не здымаліся б і пад пісталетам» ды «не падазравалі, што гэта будзе для прапаганды».
Цяпер героі фільму спрабуюць высветліць, як матэрыялы трапілі да прапагандыстаў. Аператарка, якая запісвала герояў, паабяцала даць каментар пазней, пасля поўнага ўнутранага разбору:
«Мы імкнёмся абмеркаваць усё з кожным чалавекам, звязаным з гэтаю сітуацыяй. Мы шакаваныя тым, што адбылося, ніяк такога не чакалі. Нам неабходны час».
Паводле версіі аднаго з герояў відэа, асобу таго, хто замаўляў інтэрв'ю, не спраўдзілі належным чынам.
Галоўны дарадца Ціханоўскай Франак Вячорка на момант публікацыі гэтага матэрыялу не адказаў «Белсату» на просьбу пра каментар. Прэс-сакратарка абранай прэзідэнткі Ганна Красуліна сказала «Белсату», што афіцыйны каментар хутка будзе апублікаваны ў Telegram-канале Ціханоўскай.
Тым часам праваабаронца, кіраўнік фонду «BYSOL» Андрэй Стрыжак у сваім Telegram-канале раскрыў падрабязнасці гісторыі Юліі, якая вярнулася з дзецьмі ў Беларусь:
,,«Ейнага мужа Станіслава Брыкіна 4 сакавіка знайшлі мёртвым у лагеры для ўцекачоў у Пабрадзе. Галоўная версія следства – самагубства. Ці ведаў Станіслаў, што ягоная жонка знялася ў прапагандысцкім кіно? Невядома. Ці магла б вестка пра гэта стаць кропкай у ягоным рашэнні? Магла б».
Паводле Стрыжака, лёс сям'і «вельмі пакручасты»:
«Станіслаў браў удзел у пратэстах, быў у стачцы на „Белтэлекаме“, праз ціск уладаў быў эвакуяваны. Сям'я Брыкіных паспрабавала ўладкавацца ў Нямеччыне, але паводле Дублінскага пагаднення Станіслаў апынуўся ў літоўскім лагеры для ўцекачоў, а Юлія з дзецьмі – у Беларусі (якім чынам, пакуль пытанне для мяне). Памылкаю было спрабаваць атрымаць прытулак у Нямеччыне, бо сям'я ўязджала праз Літву, і гэта першая бяспечная краіна, куды цябе высылаюць, калі ты падаешся на прытулак у іншай краіне».
Сцяпан Кубік belsat.eu
