Французскія аўтамабільныя і абаронныя кампаніі аб’яднаюцца, каб наладзіць вытворчасць беспілотнікаў ва Украіне. Узамен Кіеў падзеліцца з Парыжам сваім вопытам выкарыстання дронаў у шырокамаштабнай вайне.
Пра гэта заявіў міністр абароны Францыі Сэбаст’ен Лекарню, паведамляе «Le Figaro».
«Мы збіраемся распачаць абсалютна беспрэцэдэнтнае партнёрства, у рамках якога буйная французская аўтамабільная кампанія (я не буду агучваць яе назвы, бо гэта яе справа, як паведаміць пра гэта) аб’яднае намаганні з французскім малым і сярэднім прадпрыемствам абароннай галіны, каб абсталяваць вытворчыя лініі ва Украіне для вырабу дронаў», – паведаміў міністр.
Як патлумачыў Лекарню, беспілотнікі, вырабленыя ва Украіне, прызначаюцца для ўкраінскіх вайскоўцаў, але і французская армія таксама атрымае частку дронаў для тактычнага і аператыўнага рыхтавання.
Ён падкрэсліў, што няма патрэбы ў тым, каб французскія спецыялісты працавалі на ўкраінскіх прадпрыемствах.
«Украінцы лепшыя за нас у здольнасці прадстаўляць дроны і, асабліва, у распрацоўванні дактрыны, звязанай з імі», – заявіў Лекарню.
З ягоных словаў, Францыя, якая ўжо мае ў арсенале некалькі тысяч дронаў, цяпер спрабуе дагнаць Украіну ў гэтай галіне. У той жа час Украіна мае намер выкарыстаць больш за 4,5 мільёна беспілотнікаў цягам 2025 года, бо менавіта дроны адказныя за 70 % знішчэння варожай тэхнікі на фронце.
Раман Шавель belsat.eu
