Беларускія ВНУ і школы абавязаныя сачыць за навучэнцамі, ладзіць сярод іх прапагандысцкія акцыі і справаздачыцца пра гэта чыноўнікам.
Як атрымалася даведацца кіберпартызанам, кожны месяц Беларускі дзяржаўны ўніверсітэт дасылае справаздачу старшыні Савету Рэспублікі Наталлі Качанавай і ў пракуратуру, «як змагаюцца з экстрэмізмам і прамываюць мазгі студэнтам». Паводле дакументаў, якія апублікавалі партызаны і датуюцца восенню 2024 года, такую практыку ўвялі прынамсі з лютага 2021-га.
У справаздачах БДУ паведамляе, ці праходзілі на яго тэрыторыі якіясьці пратэставыя і «экстрэмісцкія» акцыі або «іншыя дзеянні, што груба парушаюць грамадскі парадак». Што праводзіцца аналіз «дасяжных для кантролю» тэлеграм-каналаў і чатаў у сацсетках, прафілактычная праца з навучэнцамі, якія «раней траплялі ў поле зроку праваахоўных органаў», а таксама розныя ідэалагічныя акцыі.
,,«Чым страшней лукашыстам за ўладу, тым мацней «закручваюць гайкі». Але з тым, што мы атрымліваем інфармацыю з іх сетак, па-ранейшаму нічога зрабіць не могуць», – адзначаюць кіберпартызаны.
Пра абавязак сачыць за вучнямі расказвала «Белсату» Настаўніца года Рэспублікі Беларусь – 2023 Таццяна Крапіневіч, якая вымушаная была разам з дачкою пакінуць радзіму пасля даносу. Паводле Таццяны, класныя кіраўнікі змушаныя маніторыць сацыяльныя сеткі сваіх падапечных і складаць выніковыя справаздачы: прозвішча вучня, нік, на што падпісаны.
Якуб Хруст belsat.eu
