З 10 лютага ў Беларусі істотна выраслі стаўкі ўтылізацыйнага збору, які закладаецца ў кошт машынаў. У міністэрстве прамысловасці не хаваюць, што гэта зрабілі «ў інтарэсах аўтамабільнага рынку» не толькі нашай краіны, але і Расеі. Інтарэсамі спажыўцоў улады не пераймаюцца.
«Пастанова ўраду наконт павелічэння ставак утылізацыйнага збору – лагічны і своечасовы крок у інтарэсах аўтамабільнага рынку Беларусі і Расеі і здзейснены ў межах рэалізацыі адзінай прамысловай палітыкі Саюзнай дзяржавы», – так падаражэнне імпартных машынаў растлумачыла міністэрства прамысловасці.
У ведамстве заявілі, што істотны рост ставак «дазволіць найбольш эфектыўна абараніць інтарэсы нацыянальных вытворцаў і стымуляваць пакупку транспартавых сродкаў, зробленых на тэрыторыі Саюзнай дзяржавы».
У паведамленні Мінпрамысловасці згадваецца беларуска-кітайскі «БелДжы», які «з мэтаю аптымізацыі цэнавай палітыкі прапануе зніжкі і акцыі, а таксама прымальныя для пакупнікоў крэдытныя праграмы». З гэтага чыноўнікі робяць выснову, што падаражэнне імпартных аўтаў праз павышэнне ўтыльзбору «паспрыяе абароне інтарэсаў айчынных вытворцаў транспартавых сродкаў і грамадзянаў».
Пра тое, што стаўкі гэтага збору ў Беларусі «выраўняюць» з расейскімі, урад паведаміў напрыканцы студзеня. Калі адпаведную пастанову апублікавалі, высветлілася, што беларускія ўлады выраўнялі толькі тое, што выгадна дзяржаве, але не беларусам. Ідзецца пра ільготную стаўку для фізічных асобаў, якія прыганяюць машыну для сябе.
На новыя аўты, не старэйшыя за 3 гады, збор не змяніўся: Br 544,5. На астатнія – вырас з Br 816,7 да Br 1089. У Расеі ж гэтыя стаўкі істотна меншыя: адпаведна Br 118 і Br 184 у пераліку з расейскіх рублёў.
Утылізацыйны збор наўпрост уплывае на цану аўтамабілю. Новыя стаўкі пачалі дзеяць у Беларусі 10 лютага.
«Новыя стаўкі акажуць непасрэдны і хуткі ўплыў на раздробныя цэны легкавых аўтамабіляў, што імпартуюцца. У тым ліку тыя, што імпартуюцца з Расеі або іншых дзяржаваў Еўразійскага эканамічнага саюзу», – папярэджваў раней старшыня Беларускай аўтамабільнай асацыяцыі Сяргей Варывода.
Ён звярнуў увагу на яшчэ адну змену, што прыйшла з новымі стаўкамі. Раней для беларускіх імпарцёраў быў аднолькавы збор для электракараў і гібрыдных аўтамабіляў, цяпер жа гібрыды абкладаюцца такім жа тарыфам, як і машыны з рухавікамі ўнутранага згарання.
Эксперт прагназуе скарачэнне продажу новых імпартных аўтаў у Беларусі, тактычна называючы гэта «ахаладжэннем рынку»:
«Настолькі істотны рост ставак утылізацыйнага збору, імаверна, прывядзе да істотнага ахаладжэння рынку новых легкавых аўтамабіляў. У першыя месяцы года рынак інерцыйна і з улікам эфекту нізкай базы можа працягнуць рост, аднак выхад на паказнікі штомесячных продажаў канца мінулага года мне пакуль уяўляецца праблематычным».
Цяперашняе павышэнне збору, падобна, – толькі пачатак. У Расеі плануецца штогадовы рост ставак на 10–20 % да 2030 года. І калі беларускія ўлады будуць надалей прывязвацца да ўзроўню суседняй краіны, то і ў нас утылізацыйны збор і, адпаведна, цэны на аўтатранспарт працягнуць павялічвацца.
Сцяпан Кубік belsat.eu
