Стасункі паміж Кіевам і Браціславай працягваюць пагаршацца: прэмʼер Славаччыны назваў Зяленскага жабраком і шантажыстам, а прэзідэнт адмовіўся ад візіту ў Кіеў. Славацкія ўлады, якія называюць прарасейскімі, незадаволеныя спыненнем транзіту газу праз Украіну.
Прэмʼер-міністр Славаччыны Робэрт Фіца абрынуўся з крытыкаю на прэзідэнта Украіны Уладзіміра Зяленскага на пасяджэнні парламенцкага камітэту ў еўрапейскіх справах. Гэтую сустрэчу зладзілі на патрабаванне апазіцыйных дэпутатаў пасля паездкі Фіца да Уладзіміра Пуціна.
Кіраўнік ураду Славаччыны заявіў, што ягоная паездка ў Маскву была «адкрытай і празрыстай, пра гэта ўсе ведалі, хто мусіў ведаць».
Паводле палітыка, ён размаўляў з Пуціным збольшага пра пастаўкі газу, а другой тэмай былі «мірныя ініцыятывы», у тым ліку арганізацыя перамоваў у Славаччыне.
Фіца ў чарговы раз абурыўся пастановаю Украіны спыніць транзіт расейскага паліва і абразіў Зяленскага:
,,«Прызнаюся, што часам ён мне надакучвае. Ездзіць па Еўропе, папрашайнічае і шантажуе іншых, просіць грошай. Гэта трэба спыніць».
Тым часам прэзідэнт Славаччыны Пэтэр Пэллегрыні адмовіўся ад паездкі ў Кіеў – таксама з прычыны спынення транзіту газу:
«У сітуацыі, калі ўкраінскі ўрад і прэзідэнт пастанавілі спыніць пастаўкі нашага газу, яны адмаўляюцца ад яго транзіту ў Славаччыну, што ставіць пад пагрозу энергетычную бяспеку Славаччыны, у сітуацыі, калі ўкраінскі парламент прымае закон, што забараняе транспартаванне нафты ў Славаччыну, нягледзячы на тое, што мы маем дзейсныя кантракты, у такіх умовах пра маю паездку ва Украіну не можа быць і гаворкі».
Пэллегрыні заклікаў не злавацца на яго, але ён не бачыць рацыі ехаць у Кіеў «дзеля таго, каб сфатаграфавацца» і пачуць, што «ані кроплі нафты і газу не пойдзе ў Славаччыну».
Украіна спыніла транспартаванне расейскага газу на Захад з 1 студзеня, спрабуючы пазбавіць Маскву прыбыткаў, але і губляючы таксама грошы на транзіце.
Агенцтва «Reuters» надоечы паведаміла, што на сустрэчы з Фіца 22 снежня Пуцін паабяцаў знайсці альтэрнатыўныя шляхі паставак расейскай сыравіны ў Славаччыну, напрыклад, пры дапамозе «Турэцкага патоку».
Доля расейскага газу ў славацкім імпарце складала каля 50 %, піша «DW». Нягледзячы на цяперашні скандал, без паліва рэспубліка не засталася, існуюць альтэрнатыўныя маршруты, проста газ будзе даражэй. Паводле ацэнак кампаніі SPP, найбуйнешага пастаўніка энергіі ў краіне, Славаччына можа страціць за год каля 220 млн еўраў.
Сцяпан Кубік belsat.eu