Абраная прэзідэнтка Беларусі працягнула візіт у Варшаву прамоваю ў Сейме Польшчы на слуханнях, прысвечаных нашай краіне. Святлана Ціханоўская адзначыла, што ў Беларусі напярэдадні галасавання 26 студзеня ўзмацняюцца рэпрэсіі, і заклікала адрозніваць «беларусаў і рэжым».
Святлана Ціханоўская выступіла на супольным паседжанні Сейму і Сенату Польшчы, камітэтаў у замежных і еўрапейскіх справах, паведамляецца ў Telegram-канале абранай прэзідэнткі.
Удзел у падзеі ўзялі польскія дэпутаты, эксперты, палітыкі, а таксама прадстаўнікі беларускай супольнасці: Павел Латушка, Аляксандр Мілінкевіч, Анатоль Лябедзька, Анжаліка Мельнікава, Маргарыта Ворыхава, Аліна Коўшык, Улад Кобец, Мацвей Купрэйчык.
Галоўнымі тэмамі прамовы Ціханоўскай былі палітвязні, супраца з дэмакратычнымі сіламі, пытанні рэгіянальнай бяспекі, а таксама падтрыманне беларусаў у Польшчы і «раздзяленне беларусаў і рэжыму». Лідарка заўважыла, што Польшча для беларусаў – сімвал свабоды, салідарнасці і еўрапейскай будучыні, за якую беларусы працягваюць штодзённа змагацца.
,,«Пакуль дыктатары спрабуюць атруціць наш народ „рускім мірам“ і ізаляваць яго ад свабоднага свету, мы павінны ўмацоўваць сувязі паміж людзьмі: выдаваць візы, клапаціцца пра бяспеку адно аднаго, ладзіць абмены і прадастаўляць стыпендыі. Я заклікаю вас не класці Беларусь у адзін кош з Расеяй. Нашыя грамадствы і ўмовы, у якіх яны існуюць, адрозніваюцца. Беларускае грамадства ўжо зрабіла свой выбар».
Святлана Ціханоўская звярнула ўвагу, што напярэдадні галасавання, прызначанага на 26 студзеня, у Беларусі ўзмацніліся рэпрэсіі, і «Лукашэнка паводзіцца так, нібыта сотні тысячаў людзей стаяць ля ягонага палацу».
«Часам чую меркаванне, што, магчыма, варта дамовіцца з Лукашэнкам і абараніць яго ад Пуціна. Гэта памылка. Лукашэнка не абараняе незалежнасць Беларусі. Наадварот, ён з’яўляецца пагрозай для нашай незалежнасці. Яго адзіная мэта – захаваць уладу любымі коштамі», – заявіла абраная прэзідэнтка.
Яна адзначыла ролю беларусаў, якія знайшлі ў Польшчы бяспечны прытулак: яны ўдзельнічаюць у грамадскім жыцці, займаюцца валанцёрствам, робяць ахвяраванні на карысць Украіны і беларускіх добраахвотнікаў.
«Гэтыя людзі – скарб і важная частка нашага дэмакратычнага руху. Ім патрэбная падтрымка. Мы павінны спрасціць іх жыццё», – падкрэсліла Ціханоўская.
Абраная прэзідэнтка Беларусі 8 студзеня пачала працоўны візіт у Варшаву і ўжо сустрэлася з прэм'ер-міністрам Польшчы Дональдам Тускам.
Палітыкі абмеркавалі развязванне праблемаў, з якімі сутыкаецца беларуская дыяспара, магчымасць пашырэння выдавання візаў беларускім грамадзянам, шляхі вызвалення актывіста польскай меншасці і журналіста Анджэя Пачобута ды іншых палітвязняў. Таксама ў цэнтры ўвагі была сітуацыя на беларуска-польскай мяжы, а яшчэ – далейшая супраца паміж польскімі ўладамі і дэмакратычнымі сіламі Беларусі.
У наступных планах Ціханоўскай у Варшаве – сустрэча з прэзідэнтам Анджэем Дудам, міністрам замежных справаў Радославам Сікорскім і беларускай дыяспарай.
Сцяпан Кубік belsat.eu
