Франак Вячорка, галоўны дарадца Святланы Ціханоўскай, сказаў, што падтрымоўвае як мага шырэйшае выкарыстанне нацыянальных сімвалаў, аднак «разумее і паважае» погляды кансерватараў.
Скандал разгарэўся пасля Балтыйскага прайду ў Вільні, на які беларусы прыйшлі з вялікім бел-чырвона-белым сцягам і зазналі за гэта пагрозы. У сацыяльных сетках пачаліся спрэчкі, і знайшлося нямала прыхільнікаў таго, каб забараніць нацыянальную сімволіку на акцыях падтрымання секс-меншасцяў.
Франак Вячорка, галоўны дарадца Святланы Ціханоўскай, у эфіры шоу «Раніца з «Белсатам» канстатаваў, што такія спрэчкі будуць заўсёды, нават калі Беларусь інтэгруецца ў Еўразвяз:
«Ёсць больш традыцыйны падыход, што геральдыка, сімвалы павінны выкарыстоўвацца толькі афіцыйна. Але грамадства – жывы арганізм, і грамадства будзе выкарыстоўваць сімвалы, перайначваць іх. Я памятаю дыскусію з Вершніцаю. Сапраўды быў разлом у беларускай супольнасці: ці можна Пагоню перамалёўваць і ставіць жанчыну замест мужыка-воіна. Гэта заўжды будзе».
Вячорка даў зразумець, што не бачыць праблемы ў бел-чырвона-белых сцягах на гей-акцыях, аднак «разумее і паважае» меркаванне тых, хто супраць гэтага:
,,«Я падтрымліваю любы крэатыў, то бок я тут, можа быць, менш традыцыйны ў гэтым сэнсе. І тым больш добра, калі гэтыя сімвалы проста выкарыстоўваюцца як мага шырэй. Таму што нашая задача – папулярызаваць беларускасць, сімволіку ў любых яе формах. Але я таксама разумею і паважаю меркаванне тых, хто лічыць больш кансерватыўна, што сімволіка павінна выкарыстоўвацца толькі ў геральдычна прынятых стандартах».
Напярэдадні Марш роўнасці адбыўся ў цэнтры Варшавы, і беларусы, якія ўзялі ўдзел у шэсці, зноў прынеслі бел-чырвона-белыя сцягі.
«Мы прыйшлі падтрымаць людзей, якія свабодна выказваюць сваю пазіцыю, і абараніць іх ад розных неадэкватаў, якія думаюць, што сцягі могуць належаць толькі ім. А рэч жа не ў сцягах – рэч у свабодзе волі», – сказаў карэспандэнту «Белсату» адзін з удзельнікаў.
А фемактывістка Наста Базар абурылася, што беларусы пачалі аб'ядноўвацца супраць уразлівых групаў:
«Мы вельмі доўга жылі ў сістэме таталітарызму і аўтакратыі. І людзі прывыклі, што павінен быць нехта, супраць каго можна аб'яднацца. Цяпер чамусьці стала зручна аб'ядноўвацца супраць тых, хто не можа даць адпору, але чамусьці не супраць галоўнага агрэсара – Лукашэнкі. Мы яму фізічна нічога не можам зрабіць, таму зручна гнабіць сваіх. На жаль».
Сцяпан Кубік belsat.eu
