Святлана Ціханоўская пачала працоўны візіт у Варшаву з сустрэчы з прэм'ер-міністрам Польшчы Дональдам Тускам. Як паведаміў Офіс абранай прэзідэнткі Беларусі, перамовы доўжыліся гадзіну і палітыкі «ўздымалі важныя для беларусаў пытанні».
У Telegram-канале Святланы Ціханоўскай адзначаецца, што гэтая сустрэча набыла асаблівую значнасць з увагі на тое, што з 1 студзеня Польшча старшынюе ў Радзе ЕЗ.
На перамовах з кіраўніком польскага ўраду Дональдам Тускам абмяркоўваліся «важныя для беларусаў пытанні», паведамляе Офіс абранай прэзідэнткі Беларусі. Гэта развязванне праблемаў, з якімі сутыкаецца дыяспара, магчымасць пашырэння выдавання візаў беларускім грамадзянам, шляхі вызвалення актывіста польскай меншасці і журналіста Анджэя Пачобута ды іншых палітвязняў. Таксама ў цэнтры ўвагі была сітуацыя на беларуска-польскай мяжы.
Акрамя таго, абмяркоўвалася і далейшая супраца паміж польскімі ўладамі і дэмакратычнымі сіламі Беларусі. Туск запэўніў, што падчас старшынства Польшчы ў ЕЗ Беларусь будзе прыярытэтным напрамкам.
Ціханоўская назвала сустрэчу «вельмі цёплаю і плённаю»:
,,«Удзячная польскаму ўраду і прэм’еру Туску за трывалае падтрыманне беларусаў і паслядоўную пазіцыю ў стаўленні да рэжыму Лукашэнкі. Нашая супраца – гэта не толькі знак салідарнасці, але і ўнёсак у агульную барацьбу за свабоду і дэмакратыю ў рэгіёне».
Падчас візіту ў Варшаву Ціханоўская таксама сустрэнецца з прэзідэнтам Польшчы Анджэем Дудам, міністрам замежных справаў Радославам Сікорскім і міністрам у еўрапейскіх справах Адамам Шлапкам. Плануецца ўдзел лідаркі ў слуханнях у Сейме, прысвечаных Беларусі, ды сустрэча з дыяспарай.
Сцяпан Кубік belsat.eu
