Славаччына працягне экспартаваць электраэнергію ва Украіну, нягледзячы на пагрозы прэм'ер-міністра краіны Робэрта Фіца спыніць гэтыя пастаўкі.
Мясцовы аператар сістэмы перадавання электраэнергіі SEPS будзе выконваць умовы дзейнай дамовы.
Як паведамляе чэшскае выданне «iRozhlas», дзяржаўная кампанія SEPS, якая кіруе сістэмаю перадавання электраэнергіі ў Славаччыне, забяспечыць экспарт ва Украіну ў межах надзвычайнай дапамогі. Акрамя таго, SEPS працягвае трансмежнае перадаванне электраэнергіі ў звычайным рэжыме.
Увесну мінулага года кампанія падоўжыла кантракт яшчэ на 12 месяцаў, што дазваляе пастаўляць да 150 мегаватаў электраэнергіі ў энергасістэму Украіны. За першыя 11 месяцаў мінулага года чысты экспарт электраэнергіі са Славаччыны ва Украіну склаў 2,43 тэрават-гадзіны, што ў 3,5 разу больш за паказнік за аналагічны перыяд 2023 года.
Паводле аналітыкаў, штучнае абмежаванне экспарту электраэнергіі за мяжу можа супярэчыць як еўрапейскаму, гэтак і славацкаму заканадаўству. Былы міністр эканомікі Славаччыны Карэл Гірман дадаў, што электраэнергію ва Украіну прадаюць прыватныя трэйдары, а не дзяржава. Паводле яго, спыненне экспарту можа прывесці да канфліктаў у Еўрапейскім звязе.
Украіна вымушаная імпартаваць электраэнергію з суседніх краінаў праз пашкоджанні яе энергасістэмы ў выніку расейскіх удараў.
Апошнімі днямі прэм’ер-міністр Славаччыны Робэрт Фіца пагражаў спыніць пастаўкі электраэнергіі ва Украіну ў адказ на спыненне транзіту расейскага газу праз тэрыторыю Украіны пасля заканчэння дзеяння кантракту паміж расейскім «Газпромам» і ўкраінскім «Нафтогазам».
Раман Шавель belsat.eu
