Міністр замежных справаў Расеі Сяргей Лаўроў выказаўся наконт прычынаў хуткага падзення рэжыму былога прэзідэнта Сірыі Башара аль-Асада.
Паводле кіраўніка расейскага МЗС, пагаршэнне сітуацыі было абумоўленае тым, што папярэдняе кіраўніцтва Сірыі на фоне шматгадовага канфлікту не змагло задаволіць асноўных патрэбаў насельніцтва і наладзіць дыялогу з апанентамі.
Сяргей Лаўроў адзначыў, што разлікі сірыйцаў на змены жыцця да лепшага не апраўдаліся, нягледзячы на «пераканаўчыя поспехі ў барацьбе з міжнародным тэрарызмам пры ўдзеле расейскіх ВКС». Вялікую долю віны ў гэтым кіраўнік расейскага МЗС усклаў на Вашынгтон, які «фактычна акупаваў найбольш багаты рэсурсамі паўночна-ўсходні рэгіён Сірыі, а таксама ажыццяўляў сур’ёзны санкцыйны ціск на Дамаск».
Гэта правакавала сацыяльнае незадавальненне, і сірыйскія ўлады былі вымушаныя прымаць непапулярныя захады, напрыклад, скарачаць субсідыі, лічыць міністр замежных справаў РФ.
Лаўроў дадаў, што Масква ўважліва сочыць за сітуацыяй у Сірыі, аднак пакуль што рана рабіць канчатковыя высновы.
Нагадаем, 8 снежня адбылося падзенне рэжыму Башара аль-Асада, які кіраваў Сірыяй з 2000 года, прыйшоўшы на змену свайму бацьку (кіраваў з 1971-га). Башар аль-Асад уцёк у Расею, уладу захапілі паўстанцы, найбольш актыўнымі з якіх сталася групоўка «Хаят Тахрыр аш-Шам». Яна сваймі каранямі ідзе ад «Аль-Каіды» і была звязаная з «Ісламскай дзяржаваю», але заяўляе пра разрыў з тэрарыстамі. Мноства сірыйскіх уцекачоў пачало вяртацца на радзіму.
Раман Шавель belsat.eu
