«Раскамнагляд» абмежаваў доступ да мэсэнджара «Viber». Пра гэта сталася вядома 13 снежня.
«Доступ да сэрвісу "Viber" абмежаваны ў сувязі з парушэннем патрабаванняў расейскага заканадаўства да арганізатараў распаўсюджвання інфармацыі, выкананне якіх неабходнае для перадухілення пагрозаў выкарыстання мэсэнджара ў тэрарыстычных і экстрэмісцкіх мэтах, вербавання грамадзянаў для іх здзяйснення, продажу наркотыкаў, а таксама ў сувязі з размяшчэннем супрацьпраўнай інфармацыі», – заявілі ў ведамстве.
У сваю чаргу дэпутат Дзярждумы РФ Антон Немкін сказаў ТАСС, што сума штрафаў, выпісаных «Viber» за апошнія два гады, перавысіла 1,8 млн расейскіх рублёў (17 тысячаў долараў), яны дагэтуль не аплачаныя.
У жніўні 2024 года «Раскамнагляд» заблакаваў у Расеі іншы папулярны мэсэнджар – «Signal».
Раней у Расеі неаднаразова паведамлялася пра падпалы ваенкаматаў шараговымі грамадзянамі, якія казалі, што іх на гэта намаўлялі махляры ў мэсэнджарах. Расейскія ўлады вінавацяць у гэтым украінскія спецслужбы.
Якуб Хруст belsat.eu
