Аляксандр Лукашэнка сустрэнецца з Уладзімірам Пуціным першы раз у 2025 годзе. Апошні раз яны бачыліся два з паловай месяцы таму.
13 сакавіка Аляксандр Лукашэнка плануе афіцыйны візіт у Расею і сустрэчу з Уладзімірам Пуціным у Крамлі ў фармаце «адзін на адзін», а затым у пашыраным складзе з удзелам дэлегацыяў, піша прэс-служба Лукашэнкі.
Абмеркаваць збіраюцца, паводле беларускага боку, «перспектыўныя кірункі ўзаемадзеяння», «супольную працу ў інтэграцыйных фарматах», «меркаванні ў пытаннях бягучай міжнароднай сітуацыі». Таксама маюць падпісаць пакет дакументаў (якіх, не ўдакладняецца).
Падобны анонс дае і Крэмль. Адзначаецца, што гэта першы замежны візіт Лукашэнкі пасля выбараў, што прайшлі 26 студзеня.
Апошні раз Лукашэнка бачыўся з Пуціным у канцы снежня. Сустрэча кіраўнікоў краінаў СНД 25 снежня, паводле прэс-службы Лукашэнкі, трывала дзевяць з паловаю гадзінаў, потым прэзідэнты Беларусі і Расеі правялі яшчэ паўтары гадзіны за размовамі сам-насам, наступным днём бачыліся на паседжанні ЕАЭС. А пра што размаўлялі, вядома вельмі мала. Лукашэнка сказаў, што «калі старэйшы брат з малодшым сустракаюцца, тэматыка занадта шырокая». Таксама ён паведаміў, што прасіў у Расеі дзясятак ракетных комплексаў «Арэшнік».
Лукашэнка сёлета прынамсі двойчы размаўляў з Пуціным па тэлефоне: 19 і 27 студзеня. Першы раз Пуцін віншаваў Лукашэнку з Хрышчэннем і зычыў удачы на выбарах, другі раз віншаваў з перамогай на тых выбарах (Расея – адна з нешматлікіх краінаў свету, якая гэтыя выбары прызнае) і жадаў поспехаў у працы.
Новая сустрэча адбудзецца на фоне амерыканска-ўкраінскай прапановы аб спыненні агню ва Украіне і расейскай ідэі збудаваць у Беларусі завод беспілотнікаў.
Алесь Наваборскі belsat.eu
