Вайна дронаў – гэтак нярэдка характарызуюць баявыя дзеянні ва Украіне. Карыстаюцца беспілотнікамі абодва бакі. Ці гэтак будзе далей? Заходнія медыі паведамляюць: адзін з галоўных вытворцаў гэткай тэхнікі, Кітай, значна абмежаваў пастаўкі краінам-саюзніцам Украіны. Як гэта паўплывае на хаду вайны?
Кітайскія вытворцы скарацілі продаж у ЗША і краіны Еўропы ключавых кампанентаў для вытворчасці дронаў, а ў перспектыве могуць цалкам спыніць экспарт, паведамляе Bloomberg. Як мяркуюць крыніцы агенцтва, санкцыі КНР – адказ на амерыканскую дапамогу Тайваню і забарону на продаж чыпаў ды іншых паўправаднікоў у Кітай. Такія крокі Паднябеснай цалкам адпавядаюць дынаміцы гандлёвых стасункаў з Захадам, адзначае Яўген Красулін:
«Гэта хутчэй трэба разглядаць у кантэксце гандлёвых войнаў, якія не спыняюцца паміж Кітаем і ЗША яшчэ з мінулай кадэнцыі Трампа, з 2018 года».
Пад абмежаванні КНР, на долю якой прыходзіцца 80 % камерцыйнага рынку беспілотнікаў, трапілі і кампаніі, што забяспечваюць камплектавальнымі і дронамі ўкраінскае войска для абароны ад расейскага ўварвання. Аднак гэткімі захадамі Кітай не мае намеру дапамагчы краіне-агрэсарцы, кажуць адмыслоўцы.
,,«Кітай цудоўна ведае, чым гэта яму пагражае – пагражае санкцыямі. Не падвышэннямі тарыфаў, а больш жорсткімі. Таму Кітай будзе рабіць усё магчымае, каб дыстанцыянавацца ад гэткіх падазрэнняў і абвінавачванняў», – заўважае Яўген Красулін.
Афіцыйны Пекін забараніў продаж дронаў для вайсковага выкарыстання абодвум бакам канфлікту, а ўлетку ўвёў дадатковыя захады для кантролю і абмежавання экспарту тавараў падвойнага прызначэння.
,,«Кітайскі экспарт у РФ ў лістападзе скараціўся на 10,5 %. Гэта нясе даволі сур'ёзныя праблемы для расейскага ВПК. Таксама кітайскія банкі фактычна блакуюць пераводы з трэціх краінаў ў сітуацыях закупак тавараў для Расеі.Так што эфект бумеранга можа быць не толькі і нават не столькі для Украіны, колькі для Расеі. І ўласна ўжо самі вытворцы БПЛА ў Расеі зазначаюць, што гэта прывяло да сур'ёзных праблемаў як пры прадукаванні БПЛА, так і іншых высокатэхналагічных сродкаў паражэння», – распавядае вайсковы аналітык Дмытро Снегіроў.
Украінская абаронная прамысловасць апошнім часам наладзіла ўласную вытворчасць высокатэхналагічных кампанентаў ды знайшла іншыя крыніцы іх закупак.
«Адпрацаваныя каналы дыверсіфікацыі паставак чыпаў і мікрасхемаў. Гэта ЗША, краіны Еўропы і ў першую чаргу Тайвань. То бок створаныя паралельныя каналы з улікам магчымых гандлёвых войнаў паміж ЗША і Кітаем», – працягвае Дмытро Снегіроў.
Надалей бесперапынна атрымліваць кітайскія дэталі для БПЛА зможа і Расея – праз галоўнага саюзніка ў асобе Аляксандра Лукашэнкі. Яшчэ на пачатку вайны дыктатар даў загад значна павялічыць зборку дронаў і іншых БПЛА ў Беларусі.
Да тэмы распрацоўвання і масавай вытворчасці дронаў у Беларусі Лукашэнка вяртаўся і сёлета. Сярод быццам бы айчынных распрацовак, прадэманстраваных яму вайскоўцамі, можна было пабачыць і копіі кітайскіх беспілотнікаў.
Таксама глядзіце ў сюжэце:
Аляксандр Баразенка, «Белсат»
