Гастраномія з нацыянальным акцэнтам усё больш развіваецца ў Беларусі. Прынамсі, так сцвярджаюць чыноўнікі і хваляцца, што ў краіне цяпер працуюць 242 аб‘екты грамадскага харчавання, якія спецыялізуюцца выключна на нацыянальнай кухні. Адначасна яны могуць задаволіць густы тысяч гурманаў.
5 снежня тэму нацыянальнай кухні абмеркавалі ў Белпрэсцэнтры на прэс-канферэнцыі, прысвечанай гастранамічнаму турызму, з удзелам прадстаўнікоў МАРГ, Дэпартамента па турызме Міністэрства спорту і турызму, праектаў Vulitsa Ezha, Gastrofest.by, Пясочніца.
«Гастратурызм пры мінімальных выдатках можа прынесці шмат грошай, шмат працоўных месцаў і значна ўзмацніць брэнд нашай краіны», – сцвярджае Уладзімір Богдан з тэлешоу «Еда хоть куда».
Колькасць кавярняў і рэстаранаў, у меню якіх уключаныя нацыянальныя стравы, штогод павялічваецца. Летась з‘явіліся 22 новыя ўстановы, а сёлета дадалося яшчэ 25.
У шэрагі рэстаранаў чыноўнікі ўключылі сетку «Васількі», «Мама дома», «Лепім самі», у меню якіх: калдуны, мачанка, халаднік, розныя варыяцыі дранікаў ды іншыя стравы. Падабенства асартыменту на дзяржаўным узроўні намагаюцца выдаць не за мінус, а за чарговую адметнасць.
«Давайце мы вам прыгатуем дранік, давайце прыгатуем мачанку там ці яшчэ штосьці, налеснікі нейкія. І ты разумееш, што ўсё круціцца вакол 5 – 10 асноўных страваў і гэта не дрэнна, гэта не беднасць, а эталоннасць», – каментуе Уладзімір Богдан.
Фігуруе ў пераліку ўстановаў з традыцыйнаю кухняй і айчынная версія сусветнай сеткі рэстаранаў хуткага харчавання McDonald's – Mak.by, які перыядычна прапаноўвае дранікі. Але ці варта яго за гэта прылічваць да «нашай» кухні? Заснавальніца Этнацэнтру «Світанак» у Вільні Марына Струнеўская ўпэўненая, што не:
,,«Звычайна блінцы і тое мяса, што ўтушанае ў печы – яго клалі мужчыны і ішлі касіць. Яго на блінец так клалі, а блінцы раніцай папяклі. І яны елі гэта, запівалі малаком. Можна падумаць, што гэта падобна на гэты сэндвіч».
Дый не пазіцыі ў меню робяць установу нацыянальна арыентаванаю, мяркуе экспертка:
«Вельмі класна, каб там быў нацыянальны каларыт. Гэта можа быць інтэр’ер, гэта могуць быць нейкія элементы, гэта могуць быць афіцыянты ў прыгожых строях. Па-другое, самае галоўнае, што можа быць любая кухня, але каб размаўляць па-беларуску, сустракаць гасцей па-беларуску і запрашаць беларускіх музыкаў».
Аднак пакуль нават не ва ўсіх ўстановах ёсць прапановы меню на беларускай мове.
Таксама глядзіце ў сюжэце:
Андрэй Сульжыц, «Белсат»
