Расейскія войскі ўночы з 15 на 16 чэрвеня атакавалі аб’екты ва Украіне. Тым часам украінскі прэзідэнт Уладзімір Зяленскі заявіў, што Расея плануе далейшыя атакі супраць украінскай энергетыкі, у прыватнасці існуе пагроза атамнай інфраструктуры.
Уладзімір Зяленскі адзначыў, што правёў нараду з вайскоўцамі, Службай бяспекі Украіны і ўрадавымі чыноўнікамі ў пытаннях абароны інфраструктуры ад расейскіх удараў. Паводле яго, «няма прыкметаў, што хтосьці ў Маскве рыхтуецца да заканчэння вайны і разглядае дыпламатыю сур'ёзна».
,,«Расея плануе і далейшыя атакі супраць энергетыкі, якія могуць быць цяпер менш прыкметныя свету праз засяроджванне ўвагі на сітуацыі на Блізкім Усходзе. Адпаведныя звесткі ёсць у выведак партнёраў», – сказаў прэзідэнт Украіны.
Ва Украіне разбурэнні і адзін паранены
Тым часам Расея працягнула атакі на Украіну. У Паветраных сілах ЗСУ заявілі, што сілы СПА ўночы абясшкодзілі 125 расейскіх беспілотнікаў з 138, асноўным напрамкам удару была Данеччына. Зафіксавана траплянне ў 10 лакацыях, месцы падзення абломкаў – у 8 лакацыях.
Начальнік Запарожскай абласной вайсковай адміністрацыі Іван Фёдараў адзначыў, што ў выніку варожай атакі ў Запарожжы адбыўся пажар на прамысловым прадпрыемстве. Паводле папярэдніх звестак, абышлося без пацярпелых. У Кіеўскай вобласці ў выніку расейскай атакі беспілотнікамі мужчына атрымаў раненні, пашкоджаны прыватны дом і гаспадарчыя пабудовы.
Абломкі збітых паветраных цэляў таксама пашкодзілі чатыры жылыя дамы, гараж і газавую трубу ў Чаркаскім раёне Чаркаскай вобласці, частка аднаго з сёлаў засталася без электразабеспячэння. Ніхто не пацярпеў. Акрамя таго, выбухі чулі ў Сумах і ў Хмяльніцкай вобласці, перадае «Суспільне».
У Міністэрстве абароны Расеі заявілі, што ўночы перахапілі 12 украінскіх беспілотнікаў над Арлоўскай і Варонежскай вобласцямі.
Нагадаем, што ў ноч на 14 чэрвеня ў Калінінградзе адбыўся выбух на прамысловай электрападстанцыі. Дыверсія была зладжана агентамі Галоўнага ўпраўлення разведкі Украіны. У выніку атакі, як заяўляецца, быў цалкам спынены доступ да электразабеспячэння для шэрагу аб’ектаў, у тым ліку тых, што належаць расейскаму вайскова-прамысловаму комплексу і Узброеным сілам РФ, якія размяшчаліся ў зоне правядзення аперацыі.
Якуб Хруст belsat.eu
