У Цэнтры беларускай супольнасці і культуры, ці Беларускім доме ў Вільні ноччу з 25-га на 26 кастрычніка хтосьці падпаліў дзверы і пакінуў абразлівыя надпісы на сцяне.
«Ранак пачаўся не з кавы», – паведаміў раніцай у суботу, 26 кастрычніка, на сваёй старонцы ў «Фэйсбуку» Цэнтр беларускай супольнасці і культуры.
На фотаздымках, размешчаных у суполцы, бачныя сляды ўзгарання на дзвярах, аскепкі бутэлькі. На сцяне надпіс на літоўскай мове «Прэч з Літвы».
Таксама сапсаваны мурал – копія менскіх «Дыджэяў пераменаў» з аднайменнай плошчы.
На пачатку верасня ў Цэнтры беларускай супольнасці і культуры былі разбітыя шыбы.
Абразлівыя надпісы раней з’яўляліся на сценах іншых беларускіх установаў. Так, у ноч на 28 ліпеня невядомыя разбілі шкло ў краме сувеніраў «Kropka», што належыць былому палітвязню Змітру Фурманаву, і пакінулі надпіс на літоўскай мове: «Вяртайцеся дадому, беларускія свінні».
Ува ўсіх гэтых і іншых выпадках выканаўцы не былі знойдзеныя.
Марыя Міхалевіч belsat.eu
